Dikarang Chris Bishop
KUCHING, 9 JAN: Penyampau 37 kes positif Covid-19 direkut di Rh Panjai Langi, Pasai Siong di Sibu.
Pekara tu dipansutkan Komiti Pengintu Penusah Ngenyit Pelilih(DDMC) Sibu pagi tadi alai semua kes nya ditemu dirampit kes indek ke-1,175.
Kes indek iya nya siku orang indu menua tu ti pulai ari Johor ke Kuching nengah Palan Penerbai Bilun Antarabangsa Kuala Lumpur(KLIA).
Ari Johor ke Kuala Lumpur, iya nepan penerbai bilun Firefly(FYI1335) kena 29 Disember alai ari Kuala Lumpur ke Kuching, iya nepan bilun Malaysian Airline(MAS) belumur MH2536.
Sangkai di Palan Penerbai Bilun Antarabangsa Kuching(KIA), iya ngambi peresa swab alai asil peresa ditemu negatif.
Pengudah sangkai di Sibu nengah penerbai bilun Air Asia belumur(AK6466), iya lalu dianjung pulai ngagai rumah panjai lalu dikuarantin 14 hari ba rumah.
Ba rumah panjai, ia begulai enggau bala mayuh lebuh ti ngintu pemati apai iya entara 29 nyentuk ngagai 31 Disember.
Ba maya orang indu nya ditemu positif Covid-19 iya nya kenaka 7 Januari, 74 iku peranak rumah panjai Pasai Siong ngambi peresa swab alai ari penyampau nya bisi 37 iku ditemu positif kemari(8 Januari) jam 10.30 malam.
Malam tadi, raban polis udah nyaga kandang ngelingi rumah panjai ngambika nadai siku orang pansut sereta tama.
DDMC Sibu mega madah entara 9 nyentuk ngagai 10 Januari tu, Opis Pengerai Sarawak deka ngaga peresa pengerai ba semua peranak rumah panjai ke diau ngelingi Pasai Siong.
Ngenang kaul ke sama, Menteri Muda Lokal Otoriti enggau Berumah Dr Annuar Rapaee nengah aum video begulai enggau DDMC Sibu madah 8 rumah panjai dalam kandang Pasai Siong udah diteritka perintah tagang pemindah.
Semua lapan rumah panjai iya nya Rh.Langi Ambau, Rh Jelian Nayor, Rh. Ringgit Unchu, Rh. Pom Maja, Rh. Jeram Empin, Rh. Kely Chundau enggau Rh. Nyambong Ajon.
Iya ke mega Adun Nangka madah perintah nya diteritka pengelama 14 hariberengkah kemari 8 Januari.-DayakDaily
