Dikarang Chris Bishop
KUCHING, 11 Ogos: Sarawak nadai ngerikud kes positif baru Covid-19 seharitu, ku Chairman Komiti Penusah Ngenyit Negeri Sarawak (JPBNS) Datuk Amar Douglas Uggah.
Ba aum pengarang berita ke diatur di Kuching lemai tu, iya madah penyampau semua kes positif Covid-19 mengkang 681.
Uggah mega madah bisi 10 kluster Covid-19 ti mengkang aktif di Sarawak naka ke diatu.
“Kluster ti mengkang aktif di Sarawak iya nya Kluster Syarikat Kejuruteraaan (8 kes), Kluster Mambong ( 7 kes), Kluster Pusat Perubatan (3 kes), Kluster Jupiter (3 kes), Kluster Pasar Stutong (7 kes), Kluster Jeti Kuching (2 kes).
“Kluster bukai iya nya Kluster Sentosa (31 kes), Kluster PUI Melbourne (3 kes), Kluster Syarikat Pembinaan Kuching (2 kes) enggau Kluster Pasar Satok (4 kes),” ku Uggah.
Ngenang kaul ke sama, Uggah madah seharitu bisi 3 kes baru ke udah gerai lalu dikemendar pansut ari Spital Besai Sarawak (SGH).
Tiga kes gerai mungkur 2 iku ari Pelilih Kuching sereta siku ari Pelilih Serian.
Enggau nya ku Uggah nambah, penyampau kes positif Covid-19 ti udah gerai sereta dikemendar pansut ari spital manggai 659 iku tauka 96.77 peratus ari penyampau semua kes.
“Bisi 3 iku mengkang diperubat ba wad isolasyen spital alai penyampau kes mati mengkang 19 iku.” — DayakDaily
