Cobbold John: Malaya enggau Sabah meseti ngena passport tama Sarawak

Cobbold John Lusoi

KUCHING, Dis 11: Presiden Parti Bansa Dayak Sarawak Baru (PBDSB) Cobbold John Lusoi tekenyit enggau penerang ari Opis Imigrisin Sarawak diak peranak ari Malaya enggau Sabah tau tama ke negeri tu nibuh ngena passport.

Ku iya, pekara imigrisin sebengkah kuasa otonomi ke diempu Sarawak nengah Sempekat Malaysia 1963 alai peranak kededua menua meseti nguna passport tama kitu.

“Kenyau kitai numbuhka Malaysia begulai enggau Malaya, Sabah sereta Singapura, peranak luar ti deka tama ke negeri tu meseti nguna passport.

“Tu hak kitai, hak negeri ke disetuju ba MA63 lalu enda tau sengapa diubah.

“Atur ngemendar sida (Malaya enggau Sabah) enda nguna passport tama ke Sarawak ngelanggar MA63,” ku Cobbold bejaku ngagai DayakDaily sehari tu.

Iya nambah MA63 siti sempekat antarabangsa ke dirijista ba ‘Pertubuhan Bangsa-Bangsa Bersatu (PBB)’ ba taun 1970.

Ketegal nya ku Cobbold, parlimen Malaysia nadai kuasa ngaga ubah ba MA63 alai kuasa otonomi enggau hak Sarawak ditulis ba sempekat nya.

“PBDSB enggau nyemetak mantah atur ngemendar peranak Malaya enggau Sabah tau tama ke Sarawak enda nguna passport.

“Sida meseti mandangka passport baka ke suah dikemeran ngelamatu,” tandu Cobbold.

Direktor Opis Imigrisin Sarawak, Datu Ken Leben madah ngagai DayakDaily kemari diak peranak Malaya enggau Sabah udah diketu ari mandangka passport tama ke Sarawak.

Ku Ken, sida tau tama nguna ‘disembarkation card’ IMM114 ke berengkah dikena September 1, 1986 iya nya rambau pengawa ngelanchar Feri Malaysia.

“Kenyau maya nya, peranak Malaya enggau Sabah tau ngena MyKad aja tama ke Sarawak.

“Sangkai aja di Sarawak, sida deka diberi resit IMM114 ti meri permit sangkai sereta diau ditu pengelama 3 bulan nengah pass sosial,” ku Ken.

Ken mega madah peranak Malaya enggau Sabah mengkang tau ngena passport antarabangsa tauka penerang pejalai sementara tama ke Sarawak. — DayakDaily