Chara nyilih pengajar agi ngena SOP ke bisi diatu

Dr Maszlee Malik (photo sourced from https://www.moe.gov.my)

KUALA LUMPUR, Ogos 2: Opis Menteri Pelajar (KPM) madahka chara nyilih pengajar enda dibeku sereta agi ngena prosedur operasi standard (SOP) ke bisi diatu ba proses minta pengajar bepindah.

Menteri Pelajar Dr Maszlee Malik madah opis iya nerima 5,573 peminta pengajar pindah ari Sabah enggau Sarawak ke Semenanjung lalu 873 peminta ari Semenanjung ke negeri nya.

“Kami agi SOP ke diatu bepelasarka beberapa kriteria pemerat ba servis kepentingan, pengusung ba pangku pengawa di negeri ke dipinta enggau guna opsyen di negeri ke dipinta.

KPM mega meri pemerat ngagai pengajar ti minta ketegal nitihka laki/bini lalu kami mega berundingka peminta kes bukai baka sakit kronik enggau pengelikun,” ku iya ba sesi tanya di Dewan Rakyat, kemari.

Maszlee nyaut tanya Datuk Seri Mahdzir Khalid (BN-Padang Terap) ke deka nemu sekalika KPM mekuka peminta pengajar ari Sabah enggau Sarawak ti deka mulaika diri ke Semenanjung Malaysia.


Ku Maszlee, pengurang penyampau pengajar ke minta pindah ari Sabah enggau Sarawak dalam timpuh beberapa bulan ke udah berindik ari pengajar ke minta pindah nya sida ke ngajar kelas ti ngambi peresa taun tu.

“Enti kelas nya udah ngambi peresa ujung taun tu, baru peminta sida deka diperunding lalu bisi atur nukar pengajar ke ngajar subjek kritikal bala Pelajar Islam. Enti sida (pengajar ke ngajar Pelajar Islam) ditukar, kami deka terus suntuk pengajar ungkup subjek nya di Sabah enggau Sarawak,” ku iya.

Maszlee mega madahka KPM udah numbuhka siti komiti ngambi beratika mekanisme bejalaika pengawa enggau perambu ngadaka pangku pengawa Pemantu Pengajar dikena ngelempung tating kereja pengajar di sekula.

“Opis menteri nya amat beratka tating pengawa pengajar lalu KPM mega deka beratika ntervensi bukai dikena ngurangka tating kereja pengajar nengah chara beban holistik baka ngaul volunteer enggau pengajar ke udah pinchin ba sekulah.

“Asil riput ari komiti tu deka digaga nyadi keretas perambu ngambika diperunding sereta dikemendar Kabinet,” ku iya. — DayakDaily