KUCHING, 30 JAN: Menua ke dikumbai Hutan Simpan Ulu Kinta, Perak seruran di dalam pengingat penerima Pingat Gagah Berani, Lans Koperal Bajau anak Ladi.
Sejarah betimbak enggau munsuh komunis ba menua nya kena 13 Jun 1971 mandangka pemerani bala Renjer, berambunka nyawa ngambi tau nentuka Malaysia seruran likun.
“Udah bekau aku meda ketuai kami Kapten Mohana Chandran A/L Velayuhan rebah enda benyawa ba sepiak aku lebuh ti kena timbak komunis ba pala aku sigi enda ngira diri idup agi laban penyampau tubuh munsuh maya nya jauh mayuh ari tubuh kami.
“Maya nya, kami deka ngalahka kem besai munsuh”,ku Bajau.
Bajau ti asal ari Lundu, masuk nyadi sedadu enggau Rejimen Renjer kena 26 Julai taun 1966 lalu ngetu kena 26 Julai 1976.
Taja utai tu udah lama nyadi tang pengingat Bajau ka maya sida ti betimbak nya endang agi dikingatka iya taja pan umur udah manggai lebih 70 taun.
Pemansik ari UNIMAS Profesor Madaya Dr Neilson Ilan madah, sigi enda tentu mudah bala ti bisi peneleba tebunsa lebuh belaban enggau komunis menya ngerumpang pengingat sida ari dalam runding sida.
Kebuah pia, laban sida udah merinsa ngelaban ujan ngelaban malam enggau insak enggau sabak ngetanka pengelikun enggau pemaik menua.
Ku Neilson, tu siti ari pemeri ti pemadu besai reti ngagai ngagai menua enggau bansa kitai di Malaysia.
Nusuika cherita ngagai Neilson sereta siku agi Pemansik UNIMAS Dr Regina Garai, Bajau madah kenaka pagi 13 Jun 1971 sida tubuh 15 iko bisi diasuh nginau menua Hutan Simpan Ulu Kinta.
“Lebuh maya nginau nya kami tepedaka bekau jalai munsuh ti lendat ti selalu ditengah sida.
“Ari pengelendat jalai nya dia alai kami nemu munsuh sigi mayuh bepalan ba menua nya. Tambah mega nitihka repot ti dulu agi ari nya dia alai sigi mayuh balah munsuh dipelabaka bekupang besarang ba menua nya.
“Kapten Mohana Chandran lalu manggil ngena radio call ngenataika repot utai ti dipeda kami ba endur nya ngagai Pegawai Pemerintah Batalion,”ku Bajau.
Dulu agi ari nya sida udah dibagi ngagai tiga iti raban ti mit awakka ulih mansang nyubuk semak agi ngagai palan munsuh.
Kumpulan 1 disebut nama Kumpulan Serang betuaika Kapten Mohana Chandran. Kumpulan 2 dikumbai Kumpulan Serang Hendap 1 betubuh 5 iko betuaika Leftnenan Muda Donald lalu Kumpulan 3 dikumbai Serang Hendap 2 betubuh 5 iko betuaika Koperal Musa.
Ku Bajau, sida lalu bepechah nitihka raban diri empu urung jam 2 lemai nuju siti bukit ti dipelabaka bisi kem musuh.
Lebuh niki bukit, sida dipeda munsuh alai munsuh lalu belabuh nimbak sereta ngujan sida enggau leka peluru.
“Kami sebuat lalu ngendap sereta ngiga alai belalai, sambil malas timbak munsuh ti nyau meretih munyi rendai nuju kami.
“Lebuh ti bebalas timbak nya meh Kapten Mohan kena ba pala lalu kebuska sepiak ti ngujungka iya rebah enda benyawa.”ku Bajau.
Iya lalu ngambi senapang Light Machine Gun(LMG) ari Renjer Ali lalu nimbak nerachat ngagai tunga munsuh.
Timbak diperawaika baka nya endang dikena malas timbak munsuh nyangka ulih tebunuhka munsuh, laban sida benung niki bukit sereta nyamai diselinting ari atas.
Maya nya meh semangat beperang “Agi Idup Agi Ngelaban” dikingatka Bajau.
Iya guji ngansak semak ngagai munsuh lalu niki bukit tang enda mukai-mukai iya lalu kena timbak ba pah kiba.
Sambil ngetatka pedis abi timbak, Bajau lalu belindung ba batu besai laban munsuh endang agi majak nimbak tunga ngagai sida.
Kira udah setengah jam baru sida ngetu betimbak. Udah ngetu betimbak alai Renjer Ali lalu manjung ngangau ngasuh “B Company Covering Fire, C Company Assault”.
Tu endang dikena iya ngemba bala munsuh awakka munsuh takut laban ninga bala nya mayuh.
“Kami lalu belabuh nimbak munsuh baru. Nyangka nangi ka tubuh kami amat mayuh dia alai sida munsuh bisi didinga beguai-guai bekemas bebai rari.
“Kami nadai ngansak ke atas agi tang enggau enda inggar nganti ba endur ti sama nya tadi enggaika munsuh nurun nyidi kami,”ku Bajau sambil madah kangau radio call digaga ngagai Kompeni A ngambi ulih meri bantu.
Bekau abi timbak ba pah kiba Bajau nyau enda alah tatka agi nya alai kira pukul 830 malam lalu, sida mupuk bejalai neresap babas pulai ke kaki bukit ngiga bantu.
Bangkai Kapten Mohana ti udah dibap sida enggau daun ditinggalka sida dia.
Kelimpah ari Kapten Mohana ti udah nadai dia alai Renjer Bolhi pan sama enda ditemu sida kini penunga.
Raban Renjer tu bejalai semalam malam nya lalu kira 8:30 pagi baru betemu enggau bala Kompani B.
Bajau diambi ngena bilun lalu dibai ngagai hospital awakka terus diperubat.
Bangkai Kapten Mohana mujur dipansutka ari alai ti betimbak ba hari ti ketiga lalu pia mega Renjer Bolhi ti agi idup tang balat lembut
enggau nadai daya ngelaban agi lalu sama dibai sida.
Dikena nimbal pemerani Bajau ti udah berambunka nyawa, dia alai iya diberi midul Panglima Gagah Berani (PGB).
Nitihka penerang Neilson, cherita Lans Koperal Bajau deka dipasukka dalam bup ti ngenang bala renjer ti udah bebendar belaban enggau
komunis lebuh ngaduka pemaik enggau pengelikun menua.
Ku Neilson, enti nadai orang bisi pemerani baka Bajau, menua kitai tu nyangka bedau bulih pemaik laban bala komunis sigi meruan bepegai ba
agenda ti deka megai perintah enggau ngalahka menua kitai.
Pemerani orang baka Bajau endang sigi patut dikelala sereta dikelai enggau pangkat baka Panglima Gagah Berani (PGB). “Kitai nyadi sedadu tu endang ngiga bisi betimbak tauka beperang nya alai nadai tau surut tauka rari”,Ku Bajau lebuh dipinta meri jaku peransang ngagai bala sedadu rebak diatu.
Udah ninga cherita Bajau sereta enggau penemu bala Bujang Berani Iban ti bukai ti udah enggau iya berandau dia alai Dr Regina endang ngaku pemesai reti pemerani ba kitai Iban.
Ku Regina, bala sedadu kitai endang chukup berani lalu nyabung pemerani enggau pengempang ati ti ngasuh sida sanggup berambunka nyawa.
Ba kaul ke sama, Presiden Gerempung Veteran Sedadu Kor Renjer (PVTKR) Lt Kol(B) Mohd Melintang sama bela muji pemerani bala sedadu ti chukup bebendar munaska munsuh menua kitai baka bala komunis ti ditusui Bajau.
Kelimpah ari nya, pemerani bala Bujang Berani endang selalu disema dalam leka main ti madahka sida tu orang ti “teleba neresu jemu ambun pagi, beati juring muting geraji lalu sida meh ti dikumbai orang Bujang Berani.-DayakDaily
Bajau nusuika cherita betimbak ngelaban komunis di Hutan Ulu Kinta, Perak ba taun 1971.
