Besaup mandangka Miri nyadi “City of Charm”

Datuk Lee Kim Shin (photo sourced from http://www.dun.sarawak.gov.my)

MIRI, Jan 3: Miri patut mandangka diri nyadi Bandar Raya Pematak Temuai laban ngembuan bemacha chara pengidup kelimpah mujur mandangka penyeakup bansa enggau pengelikun ba jalai pengarap, pia ku Kepala Menteri Datuk Patinggi Abang Johari Tun Abang Openg.

“Kita patut besaup mandangka pemisi Miri ti ulih matak ati temuai sereta nyadi “City of Charm,” pia ku teks jaku iya ti dibacha Menteri Muda Dagang Temuai, Art enggau Adat Asal, Datuk Lee Kim Shin ba pengerami malam nyambut penatai Taun Baru 2018.

Ku iya, Miri bandar raya kedua besai di Sarawak nangkanka bandar raya Kuching ti ngembuan penyampau tubuh ngelui 370,000 iku.

“Bisi mayuh pupu bansa baka Iban, Melayu, Kedayan, Cina, Kelabit, Kayan, Kenyah, Lun Bawang ke diau mendam di Miri sereta ngembuan jalai pengidup enggau pengarap ke bebida tang ulih diau begulai enggau likun ti mandangka penyerakup ba pupu bansa,” ku iya.

Ku iya baru, Miri patut dipandangka nyadi sebuah bandar raya ti ngembuan palan ke strategik, semak engau tasik, bisi tebing pantai ke panjai sereta dikelingi taman negara.


Iya mega madah, Bagi Menua Miri ngembuan taman ke.pemadau mayuh baka Taman Negara Bukit Lambir, Niah, Logan Bunut, Usun Apau enggau Palan Pesaka Dunya UNESCO di Taman Negara Mulu.

Kelimpah ari nya mega bisi Taman Rizab Asal di Piasau enggau tugung batu karang ba tasik Miri-Sibuti,” ku iya. — DayakDaily

Share this article!