MARUDI, Jan 3: Ujan bangat ke enda ngetu udah ngujungka buding Sekolah Kebangsaan (SK) Sungai Arang betapi enggau penanggul tanah tusur lemai kemari.
Penusah tu ukai semina nyadi ba buding nembiak lelaki enggau indu aja, tang mega dewan makai enggau stor sekula nya bela ditutup sereta dipuang ke ruju pengelikun.
Pemesai Kanan, Opis Bomba enggau Penyelamat Marudi, Iskandar Aus madahka takah tanah tusur nya ari begunan bisi 12 meter.
“Tanah tusur ke semak enggau begunan nya keterubah ditemu nyadi kena 20 Disember taun nyin tadi, tang empai balat.
“Lemai kemari tanah tusur nya dipeda majak balat nyadi ti ngujungka begunan di sekula nya enda likun agi dikena tauka endur nembiak bemalam,” ku iya.
Ku iya baru, semua nembiak sekula nya udah dipindahka ngagai rumah pengajar ngambika ngenduh sementara.
Ku iya, Opis Pelilih Marudi udah dipadah sentang penusah nya ngambika nyaup mutarka nya. — DayakDaily
