SARIKEI, Mei 5: Menteri Muda ba Opis Kepala Menteri (Pekara Korperat), Abdullah Saidol lebuh ke meri jaku pengelalu ba Pengerami Ketuai Begulai enggau Rayat, ti diatur di Bintangor sehari tu tadi madah, iya ngarapka peranak menua meri sukung penuh ngagai chalun BN.
“Kitai diatu ba jalai ke betul laban sitak Kunsil Negeri baka Maradong, Repok, Kuala Rajang enggau DUN Daro udah ari baruh kuasa BN.
“Nya alai ngarapka kitai ulih ngambi pulai Parlimen Sarikei ari penyakal awakka mudah agi kitai ngemansangka kandang menua tu,” ku iya.
Ba pengerami nya, Abdullah ke nyadi ADUN Semop ngungkupka MRP sepenyampau RM 273,000 ngagai 50 buah panjai dalam kandang Semop, RM 50ngagai Gerempung Tuai Rumah Meradong, RM60,000 ngagai 6 buah JKKK Zon Kpg Melayu Meradong lalu RM10,000 ngagai raban nembiak ari Gerempung Belia Kebangsaan Bersatu Sarawak (Seberkas) Meradong. Dulu ari nya, Kepala Menteri bisi nyuaka Surat Tanah Rizab Kpg Muhibbah sereta ngemendarka Tanah Stadium Kelab Basketball Bintangor.
Sama bisi ngulu pengerami nya Menteri Muda Perambu Mengeri, Ngatur Tanah enggau Rampa Menua, Datu Len Talif, ADUN Meradong, Datuk Ding Kuong Hiing, ADUN Batu Kitang, Lo Khere Chiang, chalun Parlimen Sarikei, Dato Sri Huang Tiong Sii enggau chalun Parlimen Tanjung Manis, Yusuf Abdul Wahab. — DayakDaily
