KOTA SAMARAHAN, Mei 5: Bisi 1,314 iku ke deka ngintu Hari Gawai enggau 2,694 iku ke deka ngintu Aidilfitri nerima pemeri ‘Sejambak Kasih’ di Samarahan ditu.
Ku Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit, Datuk Sri Fatimah Abdullah di serata negeri, bisi 31,695 iku nerima pemeri Sejambak Kasih nyerumba Gawai, lalu 16,875 iku agi nerima nyerumba Aidilfitri.
Ku Fatimah ba pengerami Sejambak Kasih Hari Gawai enggau Hari Raya Aidilfitri Opis Pengintu Pengelantang Pendiau Raban Bansa (JKM) Sarawak di Dewan Kampung Muara Tuang kemari madah, nyentuk Mac 2018, JKM Sarawak meri RM52,421,950 ngagai 56,424 penerima bantu ninting bulan di serata negeri.
Opis Pengelantang Pendiau Raban Bansa Bagi Samarahan udah meri RM3,888,750 ngagai 4,210 penerima bantu ninting bulan.
Ba pengerami nya, Fatimah mega ngelalau anang enda nurun muai undi ke Pengawa Bepilih Besai Ke-14 (PRU14), Mei 9 tu. — DayakDaily
