Beri sukung penuh ngagai BN maya PRU14

MARUDI, Jan 15: Rayat ditu dipinta meri sukung penuh ngagai Barisan Nasional ba Pengawa Bepilih Besai Ke14 (PRU14) ngambika chalun BN ulih menang nengah majoriti ke besai.

“Bulih majoriti besai reti nya sada rayat tu tampak didinga rayat lalu ngambika mending lalu ngemeratka peminta lebuh minta projek pemansang,” ku Menteri Muda Opis Kaunsil Kandang Menua Datu Dr Penguang Manggil lebuh bejadika jalai tama nuju Rumah Cr Suring Jelian, di Sungai Bain, Tinjar Baram kena Hari Enam tu tadi.

Iya mega ngelalau rayat beserakup lalu anang mudah tepawah runding mendingka jaku semaya puang parti penyakal.

Dr Penguang mega mesan ketuai komuniti anang leju nambahka penemu sida nengah chara ngulu kus enggau seminar ngambika sida ulih bejalaika pengawa ngatur genturung pendiau tauka rumah panjai enggau manah sereta ngasi.

Menteri muda nya mega meransang tetiap buah rumah panjai numbuhka raban volunteer pengerara api ke tau nyadi orang keterubah endar napi penusah nya nyema bisi nyadi.

Ba pengerami nya, Dr Penguang bisi nyiaka gran ari perintah, ke alai Komiti Oemansang enggau Pengelikun Pendiau Rumah Suring (JKKK) nerima RM25,000, JKKK Rumah Douglas Bungan nerima RM25,000, Sungai Bain Baru; JKKK Rumah Jemat, Sungai Sebatu (RM20,000); PIBG SK Sungai Bain (RM10,000) Rumah Pong Imbap, Sungai Ampun Tinjar nerima RM 13,000.

Iya mega bisi nyuaka bup ari Tun Jugah Foundation ngagai SK Sungai Bain.

Bisi ngulu pengerami nya, Sekretari Politik Kepala Menteri Alexander Asing Sadai, Chairman Kaunsil Pelilih Marudi Edward Mendai, bini Dr Penguang , Datin Monica Ukong Jaya enggau bala ketuai komuniti. — DayakDaily