Beri nama gelar ti patut ngagai artis — Isa Lee

Isa Lee

KUCHING, Sept 19: Mensia mayuh enda patut ngangau tauka ngelar artis di menua tu enggau nama ‘retis’. Kebuah pia, laban leka jaku retis nadai dalam diksyenari tang leka jaku nya semina digaga sereta ditempa pia aja sekeda raban orang enggau tuju ti enda ditemu.

Leka jaku retis tau mai nama enggau imej ti kurang manah ngagai raban artis kitai.

Penemu tu dipansutka Isa Lee, Sekretari, Serakup Anak Seni Iban Malaysia (PASIMA). Penemu nya dikena iya nyaut pasal isu nya ke bisi ayan ba Facebook maya ke diatu.

“Enti salah niat enggau chara nyebut, leka jaku retis tau mai reti ti kurang badas, tau mega ngemaruhka nama artis. Ba jaku Melayu leka jaku retis tau dikumbai “siti pengawa ngemaruh” raban artis. Tetiap iku orang ke bisi pengelandik ba muzik, lagu enggau pekara seni ke bukai patut dikangauka artis, ukai retis,” ku Isa ke lalu ngarapka peminat enggau artis patut bebasaka pangan diri.

Ditanya naka ni isu tu udah nyadi dalam industri muzik di Sarawak, Isa madah leka jaku retis mayuh udah dikena kelebih agi ba industri muzik Iban.

“Kangauka mih artis kitai ngena nama ti patut sereta betul. Nya siti ari chara kitai bebasaka pangan diri. Isu tu mega nyadi di Semenanjung Malaysia. Ngena peluang tu aku arapka semua artis di menua tu belangemetulka isu tu lalu anang meri peluang ngagai orang bukai ngangauka sida iya retis. Enggau nya, bala artis mega patut bendar nyaga pemanah nama enggau imej diri,” ku Isa.

Isa ke diatu benung popular enggau single iya ‘Tubai Pengerindu’ mega benung kiruh promo lagu nya. Ba charta Sapa Juara Waifm, Tubai Pengerindu diatu duduk ba tangga nombor empat. Isa ke mega benung ba proses ngeluarka album kompilasyen enam iku artis MK SMOKEHOUSE meri besai terima kasih ngagai semua orang ti nyukung sereta rinduka lagu iya ‘Tubai Pengerindu’. — DayakDaily