Bejejaga enggau orang ke balat majak nipu diatu – Violet Yong

Yong (mandangka poster Bank Negara Malaysia) begulai enggau pemantu khas MP Stampin, Sim Kiat Leng ba aum pemberita kemari.

KUCHING, Okt 4: Siku pengajar ke udah pinchin berasai pedis amat ati pengudah duit taruh iya sepenyampau RM 188,000 lenyau abis ketegal ditipu.

Siku pemantu pengatur pengawa ari Sri Aman mega ngasaika peneleba ke sama pengudah lenyau RM32,000.

Pia mega siku sekretari sebuah gerempung, lengis 15,800 ketegal ulah ke sama.

Semua ketetiga kes tu sebaka, iya nya kena tipu.

Orang keterubah, ulih dikelakar ketegal pechaya bisi dikaul enggau pengawa “money laundering” sereta aktiviti dadah.

Ketetiga kes tu rugi sepenyampau RM235,800 ke mega entara lapan ti diripot ngagai unit pengawa jai komersil ditu kemari.

Kaban Kunsil Negeri Pending Violet Yong, madahka diri nemu asai ati sida ke udah kena kelakar tu, seraya madahka ulah nipu ngena telefon majak nyadi diatu lalu mayuh orang udah kena laban nya.

Dalam kandang beberapa bulan, orang ke ngelakar ngena telefon tu nguji baru taktik sida dikena ngelakar mensia mayuh, nya alai mensia mayuh enda tau enda bejejaga belama.

” Tebal agi ba sekeda kes, orang ke ngagau nya madahka diri ari Bank Negara Malaysia (BNM) ngena chara ti ngenakutka baka mejal orang ke dikangau nya, ngasuh sida mayar saman tauka utang ke endang nadai,” pia ku Yong ba aum pemberita sehari tu.

Taktik ngelama tu iya nya, orang ke ngangau nya ngemba madahka nya duit injau tauka kad kredit orang ke ditelefon udah mati timpuh lalu meseti dibayar jampat. Udah nya, orang ke nipu nya madahka utang nya udah diengkah dalam akaun sida tang ulih diatur baru nyema orang ke dituduh berutang nya deka meri sida sereta penerang sentang diri sida.

Ku Yong ngelalau mensia mayuh, anang sesekali meri pengelala enggau penerang ngagai orang ti enda dikelala, lalu iya mega madahka BNM enggau bank nadai kala ngena kangau telefon ngemetulka penerang ti enda betul.

“Sebarang utai ke salah tauka penyilap akaun bank meseti diputarka ba kaunter,” ku iya.

Ke bendar BNM udah ngelalau mensia mayuh ke alai sida nadai kala ngasuh sesapa mindahka duit ngagai akaun orang ketiga lalu anang sesekali naruh duit ba sebarang akaun.

” Nya alai bejejaga lalu giga chara nyeliahka nya,” ku Yong seraya nangkan mensia mayuh ngambika betelefon ngagai lumur tol free BNM 1-300-885465, meresa pekara nya.

Yong mega madahka bisi sekeda orang ke ngelakar nya madah ngagai orang ke dikelakar, ke alai sida udah menang lumur loteri.Tu dikena ngambi ati orang ke deka dikelakar.

Ngelalau mensia mayuh ngambika teparuk enggau penusah nya, ku Yong, ” Nyema bisi orang telefon kita lalu minta kita meri penerang pasal kita empu, ripot pekara nya ngagai opis bekuasa enggau lengkas tauka telefon ngagai aku”. — DayakDaily