KUALA LUMPUR, Ogos 17: Mensia mayuh dilalau bejaga-jaga enggau kelai tumu strok angat berindik ari gaya hari ke angat sereta rangkai ke nyadi di menua tu diatu.
Kepala Direktor Pengerai, Datuk Dr Noor Hisham Abdullah madahka entara kelai tumu strok angat iya nya pala ngungut, engkual, kurang bepeluh taja pan angat lalu denyut kedap jampat.
“Klai bukai iya nya bingkul isi lembut sereta besintak, mutah, kulit rangkai sereta mirah, sawan enggau deka luput,” ku iya ba sebengkah penerang ke dikunsi akaun Facebook iya kemari.
Strok angat nyadi lebuh ikas pengangat hari ngelui terjadi 40.5 darjah celcius dibanding ikas normal tubuh mensia iya nya urung 37 darjah celcius.
Gaya nya tau ngujungka nyadi komplikasi sistem saraf untak ke tau ngasuh sesiku nya sawan, koma sereta mega tau parai.
Dr Noor Hisham ngelalau mensia mayuh nyeliahka diri ari aktiviti luar ke angat sereta ngirup mayuh ai.
Opis Meteorologi Malaysia sebedau tu madahka menua tu diatu benung betapi enggau musim Monsun Barat Daya ti ngasuh ikas pengangat angat agi ke selama tu.
Gaya hari ke angat ti nyadi ba mayuh endur di menua tu dipelaba nyadi nyentuk ke ujung minggu tu, tang tampung gaya hari ke angat agi tau nyadi nyentuk ke monsun tu babis ba ujung September tu. — DayakDaily
