Bebasaka pemutus Wong — Presiden PRS

Tan Sri Dr James Masing
IBRACO WEBSITEI

Oleh Chris Bishop

KUCHING, Julai 16: Sapit Kepala Menteri Tan Sri Dr James Masing ngelalau semua bebasaka pemutus Datuk Seri Wong Soon Koh ti deka ngelengka pangku pengawa menteri kabinet.

“Wong udah netap pemutus ngelengka pangku pengawa nyadi menteri kabinet ba dalam perintah Gabungan Parti Sarawak (GPS).

“Kitai meseti bebasaka pemutus iya (Wong),” ku Masing ngagai DayakDaily.

Masing ke mega Presiden Parti Rakyat Sarawak (PRS) sereta ngarika semua kaban parti meri jaku ‘selamat maju jaya’ ngagai Wong.

Ba kabinet negeri, Wong mangku pengawa Menteri Pekara Wang II sereta Menteri Dagang Antarabangsa enggau E-Dagang.

Kemari, Wong ke mega Presiden Parti Sarawak Bersatu (PSB) ngaga aum pengarang berita ditu alai iya madah udah netapka pemutus deka ngelengka pangku pengawa nyadi menteri Kabinet.

Wong enggau nyemetak madah deka badu alai maya ke endar endur iya badu deka ditetap pengudah betemu enggau Kepala Menteri Datuk Patinggi Abang Johari Tun Openg ba awak ke semak tu.

Ba Aum Deligit Ninting Taun (ADC) parti di Sibu kena Hari Enam tu tadi, Wong mega bisi madah diri sedia ngelengka pangku pengawa menteri kabinet.

Iya ke mega Kaban Kunsil Negeri (ADUN) Bawang Assan, ngasai enda lantang ati pengudah kabinet negeri ba aum ke diatur kena Hari Empat minggu ke udah, mutuska nadai siku kaban PSB dichiri nyadi kaunselar ba Opis Kunsil Kandang Menua (PBT) di negeri tu.

Tajapan bisi pengari dalam rintai kabinet negeri, PSB ti betuaika Wong ukai dalam gempung GPS ti megai perintah Negeri Sarawak.

Kena Hari Empat (11 Julai), Sapit Presiden PSB ke mega Menteri Muda Pengangkut Datuk Dr Jerip Susil netapka pemutus ningkilka diri ari parti.

Dr Jerip, nengah surat penerang berita ke dikeluar, madah pemutus nya digaga ketegal pechaya semina GPS aja ke ngembuan visyen, pengeran enggau program ti deka mai pemansang ba kandang menua pesisir. — DayakDaily