KUCHING, Jun 6: Kaban Parlimen Selangau, Baru Bian tekenyit sereta asa pengudah dipadah kebuah Opis Pengerai Lawas (PKD Lawas) udah dikunchi ngena rantai pengempu premis nya laban suwa pengelama 30 bulan enda.
Baru, ke mega Kaban Kunsil Negeri Sarawak Ba ‘Kelalan madahka nya mandangka baka bisi utai dipelalai ba pekara suwa premis sementara Sepital Pelilih Lawas nya.
Ku iya, suwa 30 bulan ke enda dibayar nya udah kelalu lama lalu iya iran bakani pengempu premis nya liat ati nganti ngelama nya.
“Pemesai Opis Pengerai Pelilih Lawas madah kenu ku nya nyadi bepun ari ‘penyilap dalam dokumen sempekat’ ti enda ulih diterima akal laban nyema bisi silap, enda patut pekara nya diteju nyentuk ke deka manggai tiga taun,” ku Baru ke mega Chairman PKR Sarawak.
Taja pia, Baru gaga ati laban Direktor Opis Pengerai Sarawak Dr Jamilah Hashim lalu jampat nerangka pasal penanggul suwa ti enda dibayar nya. — DayakDaily
