KUCHING, Julai 7: Kaban Kunsil Negeri Ba’kelalan, Baru Bian meri jamin Ubah ba Undang-Undang Tanah Sarawak (2018) ke deka dipejurai pagila enda semina diterima pia aja.
Ku iya, sida pechaya draf ke deka dibacha Sapit Kepala Menteri, Datuk Amar Douglas Uggah Embas enda setipak enggau pemutus Kort Federal ke sebedau tu.
“Kami deka nyakal ubah nya laban enda setipak enggau konsep Pemakai Menua, Pulau Galau ti ditegika kami,” ku iya ke mega pakar undang-undang Tanah Hak Bumiputera.
Baru mega udah ngiring seraban peranak menua nuntut hak nya nengaj undang-undang ke nyau ari beberapa taun ke udah.
Dijangka deka nengah bacha ti kedua enggau ketiga pqgila, Baru besemaya deka balat nyakal nya.
Kepala Menteri Sarawak, Datuk Patinggi Abang Johari Tun Openg sebedau tu udah besemaya mutarka penyarut nya dalam bulan Mei.
Iya mega besemaya meri “perais ke chukup manah” bekaul isu nya, ti mai konotasi perintah ke meri sukung.
Isu sensitif baka nya beguna ‘situasi menang-menang’, laban udah tu semua bansa deka nuntut pekara ke sama. — DayakDaily
