Projek Jalai Besai Pan Borneo deka dipajakka — Baru Bian

Silhouettes of workers on a construction site. — DayakDaily.com file pic. // Photo: Pixabay

KUCHING, Julai 9: Menteri Kerja Raya, Baru Bian sehari meri jamin iya ukai aja deka neruska projek ngagai Jalai Besai Pan Borneo, tang mega bebasaka malah semua kontrak ke udah sisain.

“Nyadi siku luyar, aku bebasaka kontrak ke udah disain sebedau tu.

“Aku bisi dipadah ke alai Renggat Keterubah projek tu udah diberi ngagai kontraktor.

“Beberapa pakej ari baruh Renggat Keterubah udah diberi sereta benung digaga,” ku iya dalam aum media khas di Hotel Continental sehari tu, beserimbai enggau pengerami pengaga ati iya ke udah dipadu nyadi Kaban Ahli Kabinet.

Penerang MP Parlimen Selangau nya dipansut dikena nyaut entelah bekaul enggau projek nya pengudah Pakatan Harapan megai Perintah Besai.

Sebedau tu, pengawa ngaga 11 pakej jalai besai nya di Sarawak dipejalaika Lebuhraya Borneo Utara Sdn Bhd, ngena ungkup belanja RM16.49 bilion.

Bisi 35 pakej ke beungkus RM12.8 billion udah dikemendarka di Sabah sereta disain Sabah Pan Borneo Berhad.

Taja pia ku iya, sida benung mansik status fasa kedua projek nya kelebih agi ari sukut pinta enggau penetap.

Ngenang pasal isu projek sekula repuk di serata Sarawak, Baru arap endar Sistem Binaan Bersepadu (IBS) ti diperambu sebwdau tu ke pemadu manah.

“Dibanding di Semenanjung, projek nya betapi enggau pengelubah di Sarawak ketegal isu bekal komponen IBS enggau logistik.

“Aku bisi dipadah, di Sarawak tu kitai napi penanggul ngeluarka rengka nya ti enda tegagaka rengka komponen ke chukup dikena ngaga sekula.

Bisi 415 buah sekula di Sarawak sebedau tu udah dikategorikan nyadi D3 tauka balat repuk lalu 605 buah sekula agi dalam kategori D2 enggau D1.

Baru Bian dipadu nyadi menterj nya kena 2 Julai tu tadi, nyilih MP Parlimen Petra Jaya, Datuk Seri Fadillah Yusof. — DayakDaily