KUCHING, Feb 23: Kepala Menteri Datuk Patinggi Abang Johari Tun Openg madahka perintah negeri nambah penyampau bantu ngagai sekula Cina di Sarawak ari RM6 juta taun siti nyin tadi ngagai RM7 juta taun tu.
“Taun siti nyin tadi RM6 juta udah diberi lalu taun tu aku nambah RM1 juta ungkup pelajar komuniti Cina,” ku Abang Johari ba Pengerami Taun Baru Cina 2018 enggau Pengerami Makai Lemai Penumbuh ke-39 Gempung Gerempung Cina Bagi Kuching, Samarahan enggau Serian di Kuching ditu.
Abang Johari mega madahka semina orang Sarawak aja ulih negika hak sida lalu ukai parti politik ari Semenanjung.
Abang Johari ke mega Chairman Barisan Nasional (BN) Sarawak, madahka pemambar semina ngenusahka Parti Rakyat Bersatu Sarawak (SUPP) enggau Parti Rakyat Bersatu (UPP) bekerejasama ngeringka raban bansa Cina di negeri tu.
“Aku pechaya enti kitai berakup sereta bekerejsama, kitai ulih nuntut semua hak kitai ari Kuala Lumpur.”
Abang Johari madah, enti ulih ngalahka diri ngambi pulaika pemaik, semua orang patut ngereja nya nyengkaum Presiden SUPP Datuk Dr Sim Kui Hian enggau Presiden UPP Dato Sri Wong Soon Koh.
Abang Johari mega ngenang baru pemujur SUPP ba Pengawa Bepilih Besai Negeri (PRN) ke sebedau tu ti ulih ngambi pulai tujuh kerusi ari penyakal.
Baka nya mega UPP udah menang ba lima kerusi.
“Enti dipegulaika nya deka nyadi 12 kerusi, nya kebuah aku minta kedua-dua parti ngiarka bida ke pemaik Sarawak,” ku Abang Johari. — DayakDaily
