‘Bansa Dayak patut diakun ba Konstitusyen Perintah Besai’

Mengga Mikui

SELANGAU, Okt 23: Parti Bansa Dayak Sarawak Baru (PBDSB) seruran randaka jaku Menteri Ba Opis Menteri Besai Datuk Joseph Entulu Belaun ti kala nyebut Bansa Dayak ukai bansa ‘lain-lain’.

Entulu suba kala madah, deka bejuraika pekara nya ba Parlimen Menua Malaysia ke alai, ngambika Bansa Dayak diakun ba Konstitusyen Perintah Besai.

“Sebedau tu, Presiden PBDSB kala mansutka penerang bekaul pekara tu nengah penerang media rama. Tang nadai nerima timbal ari Entulu,” ku Mengga Mikui.

“Laban iya udah besemaya, PBDSB ngarika Bansa Dayak sama nagih semaya iya lalu deka nemu pemujur pekara tu”, pia ku Mengga.

Mengga ke mega chalun PBDSB ba sitak P214 Selangau madah, kelimpah pekara tu, rayat Selangau mega sama randaka jalai alun ti meruan. Ku iya, jalai besai Sibu-Bintulu diatu balat amat belubang sereta enda rata.


“Entulu ti nyadi kaban parlimen Selangau patut ngerah Cahaya Mata Sarawak Berhad (CMSB), ngemanah jalai tu,” ku Mengga.

Entulu ke mega orang lumur dua PRS diberita enda dichalunka PRS ba PRU14 tu ila lalu deka diganti enggau Rita Insol. Sitak ba PRU14 tu dipelabaka deka alai PRS betenggali alan enggau PBDS Baru. — DayakDaily