Baka ni gaya nasit nembiak SK Pulau Seduku?

Classroom. — DayakDaily.com file pic. // Photo: Pixabay

KUCHING, Dis 26: Taja pan nembiak deka berengkah besekula baru kurang ari seminggu agi, tang apai indai nembiak SK Pulau Seduku mengkang bedau nemu dini endur anak sida besekula.

“Kena 19 Disember, siku ketuai kanan ari Opis Menteri Pelajar udah ngabas sekula nya serwta berandau enggau pengajar ba sekula nya bekaul enggau sambung bekal karan, ai, nambahka penyampau kuaters pengajar ari tiga ngagai lapan buah sereta ngaga buding ke 20 iku nembiak.

“Pemesai Opis Pelajar Pelilih Menua nya, Vivien Anak Mujah mega madahka ngagai pengajar di sekula nya ke alai sida deka dipindah ngagai sekula baru nya lebuh penggal sekula baru berengkah,” pia ku chairman PIBG sekula nya, Datuk Wan Abdillah Edruce madah.

Taja pia, nyentuk ke sehari tu sekula nya lalu nadai nerima sebarang surat ke ngasuh sida pindah ngagai sekula baru.

“PIBG udah ngaga pemutus enda nganjung bala nembiak besekula ngagai sekula lama kelebih agi maya gaya hari ke enda manah diatu,” ku Wan Abdillah.


Wan Abdillah mega madahka PIBG udah nulis surat ngagai direktor opis pelajar Sarawak bekaul pekara nya tang lalu nadai udah nerima saut ari iya.

Menteri Kereja Raya Datuk Seri Fadillah Yusof sebedu tu kala madah ke alai projek SK Pulau Seduku di Sri Aman ke lama udah tepagang deka tembu digaga sebedau ujung taun tu laban kontraktor besai projek nya udah netapka deka nyerahka sekula dalam kandang timpuh tiga minggu.

Pekara nya ditetapka direktor indu kontraktor, Iris Corporation Berhad.

Fadillah nyemetak madahka projek nya ukai ari baruh kemata opis menteri iya, tang iya ngambi inisiatif nya ketegal irauka pengelikun bala nembiak sekula nya.

Sekula primari baru Pulau Seduku nya digaga ba palan pengentap berumah baru sida tang nyema enda tembu digaga, bala nembiak enggai enda pan meranika diri besekula ba sekula lama di sebuah pulau, nurun nepan perau ngelaban angin enggau gelumbang sereta sungai ke mayuh baya. — DayakDaily