Bajet 2019: Cobbold enggau Soo bela ensiban alai Sarawak sekali agi dikelaung

Cobbold John Lusoi

KUCHING, 3 Nov: Pengudah ketuai dalam Gabungan Parti Sarawak (GPS) madahka diri enda lantang enggau Bajet 2019, bala ketuai ti ngarika parti asal nengeri tu sama bela ensiban.

Ensanus, Menteri Pekara Wang Lim Guan Eng mantaika Bajet keterubah Pakatan Harapan (PH) alai Sarawak diberi agih belanja RM4,346 juta.

Penyampau nya nambah 0.23 peratus enti dibandingka RM4,336 juta ba taun ke udah.

Tajapia, Lim enda nerangka enggau silik sentang agih belanja nya ungkup Sarawak lalu semina madah Projek Pan Borneo deka terus digaga.

Ngasaika Sarawak tauka peranak nengeri tu balat dikelaung, presiden Parti Bansa Dayak Sarawak Baru (PBDSB) Cobbold John madah bajet nya nadai mai pemaik kelebih agi ungkup bansa Dayak.

Ku iya, Sarawak patut diberi agih belanja ke besai agi ketegal Sarawak enda nyemaka nengeri bukai di Malaya.

“Sarawak kaling sama hak alai nengeri tu begulai enggau Sabah sereta Malaya numbuhka Federasyen Malaysia,” ku Cobbold.

Iya netapka PH patut ngagihka RM10 biliun ngagai kededua Sarawak enggau Sabah ngambi tau dikena ngemansang kandang menua pesisir ti kelalu jauh tinggal.

Nambahka nya ku Cobbold enggau nyemetak, Bajet 2019 enda nyebut komuniti Dayak, reti nya bansa asal di Pulau Borneo udah dikelaung.

“PBDSB beratika bajet tu enda nyendia agih belanja ungkup komuniti Dayak sereta enda nyebut ngakun Dayak nyadi sebengkah bansa dalam Malaysia.

“Sekalika ‘Lain-lain’ dalam pom perintah (Konstitusyen Federal) udah ditukar nyadi ‘Dayak’?” tanya Cobbold.

Iya madah PH patut nyendia agih belanja ke engkeman ungkup program ubah menua pesisir ke tebal agi diwan bansa Dayak.

Agih belanja nya ku iya nyengkaum nyendia pengelandik teknikel lalu ke pemadu berat pekara pelajar anak Dayak.

“Dayak begunaka tadika, sekula primari enggau sekundari lalu pia mega begunaka kolej pematih pengelandik teknikel Dayak, universiti Dayak baka ke siti di Kalimantan,” ku Cobbold.

Lina Soo

Ngenang kaul ke sama, presiden Parti Reformasi Sarawak (STAR) Lina Soo ngasai Bajet 2019 nya siti bajet anak mit, ke enda diterang enggau silik.

Ungkup Sarawak ku iya, bajet nya tau ditelah ‘Big Fat Zero’ alai RM4.346 biliun diberi ungkup pengawa pemansang, semina nambah 0.23 peratus ari taun ke udah.

“Menteri Besai Tun Mahathir bedau lama bisi madah diak Petronas ulih mayar Perintah Besai penyampau RM30 biliun asil untung pengudah rega minyak niki diatu, alai rega tu semina kurang US$50 setung ba pun taun tu.

“Diatu rega minyak manggai US$77 setung alai Sarawak mansutka 800,000 tung sehari lalu nya manggai RM250 juta sehari,” ku Soo ngira.

Nama kebuah Sarawak enda diberi sesen ari penguntung tu? Tanya Soo seraya madah Perintah Besai mega nerima bayar royalti, dividen enggau asil chukai.

Soo nambah, semaya manis PH ti negika Sarawak nyadi ‘kaling sama hak’ sereta semaya kusung ba pengawa pemansang di Sarawak tebal agi mandangka politik rheotorik sida.

“Maya mantaika bajet, kitai (Sarawak) nyau sama bela baka Perlis enggau Kedah,” ku Soo. — DayakDaily