Aum keterubah Parlimen deka berengkah Julai 16

Tun Dr Mahathir Mohamad

PUTRAJAYA, Jun 7: Parlimen deka baum ungkup keterubah endar pengudah Pengawa Bepilih ke-14 berengkah ari Julai 16 pengelama 20 hari.

Menteri Besai Tun Dr Mahathir Mohamad madahka aum Parlimen nya deka berengkah enggau pengawa itu milih Yang Dipertua enggau Sapit Yang Dipertua Dewan Rakyat enggau Dewan Negara ditangkanka pengawa ngangkat sumpah.

Ku iya, atur munaska Chukai Barang enggau Servis (GST) enggau Akta Anti-Berita Bula sereta ubah ba sekeda akta bukai deka dipejurai maya aum Parlimen nya.

“Bisi beberapa ubah ba undang-undang bukai ti deka dipadahka kami maya nya,” ku iya dalam aum media pengudah nyadi chairman aum kabinet di Perdana Putra ditu kemari.

Dr Mahathir madahka perintah deka minta pemendar ari Yang di-Pertuan Agong Sultan Muhammad V datai lalu muka aum Parlimen kena 17 Julai sereta ngenataika jaku diraja.

Dr Mahathir madah agih RM500,000 diungkup ke Kaban Parlimen perintah, RM100,000 ungkup Kaban Parlimen penyakal sereta agih RM200,000 ngagai palan servis Kaban Parlimen deka diberi sebedau Hari Raya Aidilfitri.

Sentang pekara mulaika kuasa ngagai Sarawak, Dr Mahathir madahka perintah besai bebasaka pekara ti udah didanji nya.

Dalam kes Petroliam Nasional Bhd (Petronas) ngelaban Perintah Negeri Sarawak, ku iya”nya tepulai ngagai kort mutuska nya”.

Kena Jun 4, Opis Akim Besai Negeri Sarawak nerima notis ari Penngerejister Kort Tinggi tu madahka perintah negeri dinamaka nyadi piak dalam siti saman ari Petronas.

Serikat minyak nasional nya madah udah nganjung fail peminta di Kort Tinggi ngulihka kuasa ba Akta Pemansang Petroleum 1974 (PDA) nyadi undang-undang ke dikena ba industri petroleum di Malaysia.

Serikat nya minta kort meri kuasa ke alai ari baruh PDA, sida pengempu eksklusif pemansut petroleum di menua tu, nyengkaum Sarawak. — DayakDaily