KUALA LUMPUR, Jun 12: Langgur penemu Tun Dr Mahathir Mohamad ke deka muka sebuah agi projek kerita nasional ke bendar nerima timbal positif ari rayat.
Taja pia, netizen minta Menteri Besai fokus ngagai perengka pengangkut mensia mayuh laban nya dipeda mayuh agi meri pemaik ngagai rayat.
Ambika chunto, Khairul Hanif madahka ke beguna amat diatu iya nya ngangkatmanah sistem perengka pengangkut mensia mayuh kelebih agi di Sabah enggau Sarawak.
Lebuh bejaku ba Aum Entarabansa ‘Masa Depan Asia’ (Aum Nikkei) ke-24 di Tokyo, Jepun kena pagi Hari Satu, Tun Mahathir madahka projek nya deka dipejalaika nengah kerejasama beberapa menua di rantau tu
“Juluk kami diatu deka ngepunka sekarang sebengkah agi projek kerita nasional, nyangka nengah kerejasama menua serantau,” ku iya.
Tambah Menteri Besai, Thailand enggau Jepun menua serantau ke ngembuan pengelandik ngaga kerita.
Iya udah numbuhka Proton dalam taun 1983, tang udah dijual ngagai Geely, sebuah kompeni automotif ari menua China.
Netizen madah, agih ungkus dikena numbuhka projek kerita nasional patut dikena ngangkatmanah perengka pengangkut mensia mayuh menua.
Nya nyengkaum ngemajakka projek Transit Aliran Massa (MRT) Jalai 3 tauka Jalai MRT Lingkaran enggau projek Kereta Api Bepengelaju Tinggi (HSR) entara Kuala Lumpur enggau Singapura.
Taja pia, pun bulan tu tadi Menteri madahka diri nginsil HSR. — DayakDaily
