MIRI, Mac 26: Apai indai kelebih agi di menua pesisir enggau ulu entigis meseti ngerejista anak ke diada ngambika nadai penaggul minta nyadi peranak menua.
Menteri Muda Dagang Temuai, Art enggau Main Asal Datuk Lee Kim Shin madah, bisi nembiak mit ke enda besekula laban nadai setipikit pengada enggau kad pengelala.
“Kitai kasih amat ke nembiak ti ada di Sarawak ke nadai setipikit pengada ti lalu ngenusahka bala nembiak tu besekula,” ku iya ditu kemari.
Kaban Kunsil Negeri (ADUN) Senadin nya madah, apai di menua pesisir enggau ulu entigis patut nemu sentang pemesai guna ngembuan dokumen pengelala diri ke sah.
“Enti nadai setipikit pengada tauka kad pengelala, bala anak enda tau besekula nyengkaum pedis ngulihka bantu ari perintah,” ku iya.
Dulu ari nya, Lee nyuaka setipikit pengada enggau kad pengelala ngagai 19 penerima ari sitak DUN Senadin.
Sida tu ari raban ke umur entara 13 taun ngagai 55 taun ti ada di menua pesisirtang udah pindah lalu gawa dj mengeri.
Lee mega madahka perintah udah nguji munaska penanggu enda nemu macha ba sekeda peranak di menua pesisir.
“Aku deka nguji ngenataika penanggul anak mit nadai besekula tu ngagai Opis Pelajar Negeri ngambika sida mega ulih,” ku iya.
Sama bisi datai Ketuai Unit Khas Mindah Kin Kitu (UKB) Opis Pengerejista Bansa Menua Affrizan Bujang enggau Ketuai Operasi Biro Aduan Awam SUPP Miri Erick Chin Fen Siong. — DayakDaily
