Entulu enda bebendar mutarka isu leka sebut Dayak — PBDSB

KUCHING, Mac 26: Parti Bansa Dayak Sarawak Baru (PBDSB) enda lantang ati pengudah leka sebut Dayak mengkang nadai ‘force of law’ tajapan pekara nya udah dipejurai Niang Pehin Sri Adenan Satem tiga taun ke udah.

Berindik enggau nya, Presiden PBDSB Cobbold John Lusoi nuduh Menteri ba Opis Menteri Besai Datuk Joseph Entulu enda beratka pekara nya ke pemaik Dayak kelebih agi peranak Sarawak.

“Aku tekenyit ninga Entulu madah ngembuan ‘force of law’ nadai mai reti ke nyengala.

“Iya mega enda kiruh deka mutarka pekara tu enggau lengkas,” ku Cobbold.

Entulu ke mega Kaban Parlimen (MP) Selangau bedau lama tu tadi madah atur mai mosyen ngaga ubah ba konstitusyen enda deka diterima laban begunaka sukung dua pertiga MP.

Iya mega madahka Perintah Barisan Nasional (BN) nadai bulih sukung dua pertiga di parlimen ke tau ngemujur ubah konstitusyen sentang pekara nya. — DayakDaily