KUCHING, Dis 16: Kaban Parlimen (MP) Saratok Ali Biju netapkan Perintah Pakatan Harapan (PH) enda ngelaungka pemaik bansa Dayak.
Berindik enggau nya iya minta bansa Dayak enda pechayaka tuduh ari sekeda orang diak pemaik sereta penguntung Dayak enda dikeibuh perintah baru PH.
“Sekumbang kitai udah megai perintah federal, mayuh bala kitai nanya bengkah penguntung kitai Dayak ari perintah baru diatu.
“Nyadi aku madah penguntung tu enda ulih dipeda sekelip mata, enda ulih dipeda baka ke muai empeleman.
“Enda baka nya, ketegal kitai ke ngatur perintah, pengawa tu panjai lalu ukai dikereja siku.
“Enda mudah baka ke tuduh sekeda orang ti madah sekumbang PH menang, kitai Dayak enda diguna orang,” ku iya.
Ali mansutka jaku nya ba pengerami Makai Lemai Krismas 2018 ke diatur di Penview Convention Centre(PCC) di Demak Laut, Kuching malam tadi.
Pengerami nya ngundang temuai dipebasa Menteri Kereja Raya ke mega MP Selangau sereta Kaban Kunsil Negeri(ADUN) Ba’Kelalan Baru Bian.
Ngenang kaul ke sama, Ali ke mega ADUN Krian madah tanggungpengawa perintah baru PH diatu mayuh.
Ku iya, perintah PH napi pemar ketegal belanja menua Malaysia diatu udah kurang alai penatai pemisi pan kurang.
Semua nya ku Ali nyadi ketegal belanja menua udah mayuh dipebasau perintah besai ke dulu iya nya Barisan Nasional(BN).
“Udah semua pemar tu diputar, maya nya baru kitai meda ngagai ungkup kitai empu. Penguntung sigi deka datai ngagai kitai Dayak.
“Diatu, perintah PH enda kala enda ningaka sebana jaku kitai. Tajapan Baru Bian siku aja ba kabinet, perintah PH ninga sereta ngasika jaku iya,” ku Ali.
Ba sentang kaul bukai, iya meri puji ngagai pengawa ke udah dikereja raban orang dalam gerempung ke ukai dikuasa perintah (NGO).
Iya madah NGO udah mayuh mantu PH menang ba Pengawa Bepilih Besai Ke-14 ke diatur ba bulan Mei tu tadi alai PH mujur numbuhka perintah baru ngalahka BN.
“Terima kasih ngagai sukung ari bala dalam NGO ti udah mantu kitai nempa pemujur keterubah. Pemujur kedua enda lama agi (dalam timpuh 2 taun setengah).
“Ngarapka semua raban NGO majakka pengawa meri penerang sereta penemu ngagai bala rayat ke jauh, ke enda nemu ulu ili,” ku iya.
NGO ngelamatu ku Ali nambah dikumbai sekeda orang nadai guna.
Tang diatu NGO ulih nyaup ngalihka perintah,tandu Ali.
Makai Lemai Krismas 2018 malam tadi diatur Gerempung Dayak Sarawak (PEDAS), Dayak Think Thank Group Kuching (DTTG) sereta SADIA Krian.
Pengerami mega digulu rabam ari NGO bukai baka ka ari PAIS, SDNU, DBK enggau NGASI. — DayakDaily
