Baru Bian: Enda semua jalai di Sarawak dibaruh kuasa KKR

Baru (enam dari kanan) disempulang temuai bukai ngempat kek nyadika simbolik bejadi Malam Krismas 2018 di Kuching.

KUCHING, Dis 16: Opis Menteri Kereja Raya (KKR) semina ngemata jalai ke dikuasa perintah federal, ku Menteri KKR Baru Bian.

Bejaku ba pengerami Makai Lemai Krismas 2018 di Kuching malam tadi, iya netapka ukai semua jalai di Malaysia nyengkaum di Sarawak dikemata KKR.

“Tajapan aku dichiri nyadi menteri kereja raya, lalu pengudah diberi penerang ari opis menteri (KKR) baru aku mereti diak KKR semina ngemata jalai federal.

“Di Sarawak, kesatu semina jalai besai pan borneo ke nyadi jalai federal alai nya mungkur sekeda jalai ke enda bangat panjai di Limbang, Lawas, Miri enggau Kuching.

“Kedua, jalai federal mungkur semua jalai ke nuju palan penyangkai bilun lalu ketiga jalai ke nuju palan penyangkai kapal.

“Keempat, semua jalai nuju universiti mega diakun nyadi jalai federal,” ku iya.

Kelimpah ari semua jalai nya ku Baru ke mega Chairman Parti Keadilan Rakyat(PKR) Sarawak, jalai bukai dikuasa perintah negeri.

Ungkup pengawa ngaga jalai di menua pesisir, Baru madah pengawa nya dikuasa Opis Menteri Pemansang Menua Pesisir (KKLB) ke dipegai Datuk Seri Rina Harun enggau Sivarasa Rasiah.

“Tu meh pekara ke ngasuh aku tusah merunding alai dulu agi ari tu aku mikir menteri kereja raya megai kuasa ba semua jalai di Malaysia.

“Tu meh pemar enggau penanggul di Sarawak, enti kitai deka ngaga jalai di kandang menua pesisir, KKLB ke megai kuasa,” ku iya.

Ngenang kaul ke sama, Baru ke mega MP Selangau enggau ADUN Ba’Kelalan madah pinta projek pemansang jalai alun di kandang menua pesisir tetap ulih dikenatai ngagai KKLB.

Makai lemai Krismas 2018 di Penview Convention Centre (PCC) Demak Laut malam tadi diatur tiga bengkah NGO Dayak iya nya PEDAS, DTTG Kuching enggau SADIA Krian.

Bela ngerami bala kaban ari NGO Dayak ke bukai baka ke PAIS, SDNU sereta DBK.

Ba pengerami nya mega, Baru minta kaban dalam NGO meri penerang sentang tanggungpengawa KKR ngagai peranak di rumah panjai.

“Kitai meseti nerangka enggau silik sereta betul ngagai peranak rumah panjai ngambika sida mereti,”ku iya.

Bela datai MP Saratok ke mega ADUN Krian Ali Biju, MP Puncak Borneo Willie Mongin, Presiden SADIA Sidi Munan, Chairman SADIA Krian Andrew Paul, Chairman DTTG Kuching Sybestine Gambong, Mandal Presiden PEDAS Victor Asun sereta orang bukai. — DayakDaily