KUCHING, Jun 7: Ketuai Pampang Nembiak Parti Bansa Dayak Sarawak Baru (PBDSB), Rapelson Richard Hamit minta Menteri Besai Tun Dr Mahathir Mohamad ngagihka belanja sama rata ngagai semua pengari rayat enda ngira ari parti ke megai merintah tauka penyakal.
“Pakatan Harapan (PH) tenda patut nitihka singkang Barisan Nasional (BN) maya ngiring Malaysia. Sida patut mandangka sida enda bechiping ngagai semua pengari rayat enda ngira sekalika ari parti pemerintah tauka parti penyakal,” ku iya.
Menteri Besai udah mantaika agih belanja RM500,000 ungkup Kaban Parlimen perintah, RM100,000 ungkup Kaban Parlimen penyakal sereta RM200,000 ungkup palan servis Kaban Parlimen ke deka diberi sebedau Hari Raya Aidilfitri.
“Agih belanja ungkup sitak nya patt dibagi enggau chara lurus. Kitai patut bechuntoka penuai sistem politik baka di Eropah,” ku iya.
Baka nya mega agih belanja pengawa bepilih besai, ku iya, patut diberi ngagai parti penyakal lalu patu dibagi enggau sama rata. — DayakDaily
