ADUN Machan: Terima projek pemansang ari perintah

Allan (dua kiba) nyuaka surat chiri nyadi pengulu ngagai Uding.

KUCHING, Julai 28: Kaban Kunsil Negeri (ADUN) Machan Allan Siden Gramong ngelalau peranak rumah panjai meri kerejasama ngemujur projek ke diperambu perintah.

Bejaku ba pengerami begulai enggau rayat di Rumah Enyang Kana, Nanga Ulin Ulu Poi, iya madah semua projek ke deka digaga perintah baka ke jalai alun sigi ungkup pemaik rayat.

“Enti bisi projek pemansang ti deka digaga kelebih agi baka ke ngaga jalai alun, anang mantah.

“Enti dibantah, perintah enda ulih ngemujurka projek nya,” ku iya bedau lama tu tadi.

Beambika chunto projek ngaga jalai nyambung rumah Pengulu Uding Upak ngagai rumah panjai Enyang Kana ba pemanjai 2.5km, Allan madah projek nya dikearap ulih ngangkatka tikas pengidup rayat ke diau ngelingi Ulu Poi.

Ba pengerami nya, Allan bisi ngagihka belanja penyampau RM50,000 dikena ngaga rumah panjai baru, Rh Enyang.

Iya mega bisi nyuaka surat chiri nyadi pengulu ngagai Uding. — DayakDaily