Abang Jo enda nyemetak penemu, penanggul tanah NCR deka majak mar

Parti Bansa Dayak Sarawak Baru logo

KAPIT, Oct 17: Parti Bansa Dayak Sarawak Baru (PBDSB) nuduh Kepala Menteri Sarawak Datuk Patinggi Abang Johari Tun Openg enggau Kabinet Nengeri Sarawak ngembuan ulah ti kelalu nangi.

Ba penerang berita iya kemari, Kepala Menteri madahka perintah nengeri sedia ngakun Tanah Adat Bansa Asal(NCR) nyengkaum Pemakai Menua (PM) enggau Pulau Galau(PG), tang reti tanah nya enda tau enda nyemetak.

“Ba penerang iya, Abang Jo madahka reti Pemakai Menua enggau Pulau Galau tu enda nyemetak. Nya alai iya nyerahka tanggungpengawa ngagai Uggah numbuh ka komiti mansik pekara tu. Tu ngamatka jaku aku ti dulu ke alai Abang Jo semina ngelempaika penanggul NCR ba Uggah aja”, ku presiden PBDSB Cobbold John.

“Ba senentang tu, aku ngumbai iya paranoid sereta nadai adap tuju, lalu suah bedalihka reti PM enggau PG. Tang, iya enda ingat, tiga iku sapit iya kala nyadi Menteri Tanah lalu bekuasa ngubah Kod Tanah Sarawak”, ku Cobbold nerang.

Pemutus kes Tuai Rumah Nyutan tu pelaba aku tentu meri empas ngagai pansik komiti ti betuaika Uggah. Kebuah pia, Kort Federal udah netapka pemutus tanah ti udah diberi Provisional Lease ukai tanah NCR agi lalu deka nyadi tanah perintah, ku Cobbold nerang.


Berindik ari pemutus kes Tuai Rumah Nyutan, pekara tu deka nyadi majak mar dudi hari ila. Nya alai, pekara tu enda tau enda diberi jaku pemutus enggau lengkas.

Cobbold mega madahka, entara resolusyen ti patut dikena ngakun Tanah Adat Bansa Asal (NCR), iya nya nengah chara meri PL ngagai pengempu tanah lalu ukai nengah sebarang kompeni tauka ejensi dikuasa perintah. Tang ku iya, perintah BN enggai narit PL ari kompeni laban sida nangi bebayarka ungkus ti mar.

Cobbold ke benung bejalaika pengawa parti di Kapit madah, Kepala Menteri patut ngaga atur betemu ngenyit entara penyakal enggau Barisan Nasional. Tu beguna amat nyadika platform bejurai pasal isu NCR tu enggau silik agi.

Kemari, Ketuai Nembiak parti tu mega ngansak perintah ngengkahka baru Seksyen 5(2)(f) ba ubah Kod Tanah Sarawak.

Nengah awak nya mega, iya madah deka ngaga penerang berita bekaul enggau siku chalun PBDS Baru ti deka dikirai di Kanowit. — DayakDaily