SABERKAS patut ulih nyaup ngemujur pinta KM — Sagah

Datuk Roland Sagah Wee Inn - file pic

KUCHING, Okt 17: Kaban Gerempung Nembiak Nengeri Sarawak (SABERKAS) patut nimbal pinta Kepala Menteri Datuk Patinggi Abang Johari Tun Openg ke deka ngemujurka juluk nuju nengeri digital.

Ku Mandal Presiden gerempung nya Datuk Roland Sagah Wee Inn, mayuh bengkah polisi baru dibantai kenyau Abang Johari nyadi ketuai ngiring nengeri tu.

Ku iya, ke beguna amat iya nya, SABERKAS patut nimbal pinta nya lalu sama enggau ngemujurka polisi baru perintah.

“Kita patut nimbal pinta Presiden (Abang Johari) ti dekaka Sarawak nyadi sebuah nengeri digital.

“Nengah polisi baru Kepala Menteri, kitai pechaya nya ukai semina ulih ngemajuka nengeri tang mega rayat kelebih agi raban nembiak,” ku iya.


Ku iya baru, polisi ekonomi digital mungkur semua sektor nyengkaum industri, komersial enggau betanam betupi.

“Nya nyadi singkang Sarawak nuju dunya digital,” ku iya.

“Aku pechaya SABERKAS ulih ngereja sereta nyaup ngemujurka juluk enggau polisi perintah nya,” ku iya. — DayakDaily