Ubah ordinan ukai reti ngemudah ‘mualaf’ pansut ari Islam — Opis Kepala Menteri

Datuk Patinggi Abang Johari Tun Openg

KUCHING, Mac 4: Opis Kepala Menteri Sarawak laun malam tadi nyangkal utai tulis siti portal ti madahka perambu ngubah Ordinan Majlis Islam Sarawak 2001 betuju ngemudahka raban ‘mualaf’ pansut ari Islam.

“Tulis nya amat enda betul,” ku opis nya ba penerang media.

Ku iya, ukai baka ti dipadahka ba jaku enggau aum media Kepala Menteri, Datuk Patinggi Abang Johari Tun Openg pengudah bejadi Sekolah Antarabangsa St Joseph Kuching kemari.

“Ubah Ordinan Majlis Islam Sarawak 2001 ukai ngemudah raban mualaf pansut ari Islam.

“Kepala Menteri nyata udah madah beratika Kot Federal udah ngaga pemutus ke alai Kot Syariah bisi bidang kuasa mendingka kes murtad, nya alai patut bisi atur baru nyengkaum nyerenih ngambika ulih ngubah ordinan tu.


“Nya kebuah bisi pematut nyediaka prosedur operasi standard (SOP) ke tuju bejalaika nya,” ku iya.

Perambu ngubah nya ukai pekara baru, tang udah lama deka dipejalaika Perintah Nengeri Sarawak.

Taun nyin tadi, Kepala Menteri Datuk Patinggi Abang Johari Tun Openg udah minta Menteri Muda Undang-Undang, Kaul Perintah Besai-Negeri enggau Matau Projek, Sharifah Hasidah Sayeed Aman Ghazali beratika pengurang ordinan nya.

Nya alai Abang Johari skemari madahka sida benung ba proses ke penudi ngubah , nyengkaum nyerenih implikasi undang-undang. — DayakDaily