SIBURAN, Dis 13: Lima iku chalun bepotensi diatu benung besemekih mantaika diri deka ngarika Parti Pesaka Bumiputera Bersatu (PBB) sitak Puncak Borneo, nyilih Datuk Seri Dr James Dawos Mamit.
Dawos ke mega Sapit Menteri Kuasa, Teknologi Gadung enggau Ai sebedau tu ngarika sitak Mambong ke alai diatu dikelala enggau nama Puncak Borneo, diberita enda agi bediri minta pilih ketegal penanggul pengerai.
Nitihka pemadah, nama ke didinga bisi disebut iya nya Sapit Residen Kuching Tuah Suni, Pemesai Khas Dawos, Datuk Detta Samen, 53, Sapit Direktor Unit Pengelikun ba Opis Kepala Menteri Datuk Clarence Rorote, 52, Cr Wejok Tumek, siku luyar ke pas ari UIA enggau Sekretari peribit Dawos, Siang Prede.
Penerang nya madah, tiga iku chalun Deta, Siang enggau Tuah diatu benung regas ngelakuka diri sereta suah dipeda ngulu pengerami ke diatur parti tauka perintah.
Diberitaka mega Dawos rindu agi ngagai Deta enggau Siang laban manah kaul enggau iya, tambah mega Dawos dekaka legasi iya diteruska.
Ba Pengawa Bepilih Besai (PRU) ke sebedau ru, Dawos bulih majoriti 9,721, ngalahka Willie Mongin (PKR) enggau Dripin Sakoi (Star).
Chalun Barisan Nasional dipelaba deka disatup chalun PKR, Willie enggau PBDS Baru, Andrew Puro, ia nya ex-menijar bank Siburan. — DayakDaily
