27 iku nerima cek bayar pampas tanah penyampau RM474,000 di Ulu Bayor, Debak

Uggah (kiba) nyuaka cek pampas ngagau siku penerima di Ulu Bayor, Debak.

KUCHING, 19 Julai: Sapit Kepala Menteri Datuk Amar Douglas Uggah kemari nyuaka cek bayar pampas tanah penyampau RM474,000 ngagai 27 iku penerima di Ulu Bayor, Debak.

Perintah mayar pengudah tanah sida kena bungkur Fasa 1 Projek Jalai Penom-Ulu Bayor-Danau- Betong pemanjai 7.4 kilometer ke beungkus RM9.9 juta.

“Perintah sigi deka mayar pampas enggau adil enti tanah rayat bisi diambi perintah ungkup projek pemansang.

“Sekeda orang ngembuan runding ke enda manah, sengapa bejaika Perintah Gabungan Parti Sarawak (GPS) dikena mantupka juluk ati sida,” ku Uggah ba pengerami ke diatur di Rh Jimmy Ngelambai di Betong.

Uggah ke mega ADUN Bukit Saban madah pengawa sehari nya mega mandangka perintah sigi ngakun tanah NCR sereta orang bempu tanah nengah Seksyen 6.

Ba hari ke sama, Uggah mega bisi nyuaka geran ngagai 6 sekula primari enggau 1 sekula sekundari di Betong ngambi ulih dikena sekula nyendiaka perengka ke diguna ngambi ulih nitihka prosedur operasyen ‘standard’ (SOP) maya sekula dibuka.

SMK Spaoh nerima RM15,000, SK Spaoh (RM10,000), SJKC Chung Hua(RM7,000), SK Suri (RM15,000), SK Nanga Gayau (RM5,000), SK Paku Sentral (RM8,000) sereta SK Nanga Tiga (RM15,000).

Ku Uggah, geran nya deka dikena sekula meli perengka termometer enggau nyendia palan masu jari ba tetiap sekula.

Iya mega ngelalau semua sekula ngambi nitih SOP ke udah ditetap enggau terit ungkup pemaik nembiak, pengajar enggau staff sekula. — DayakDaily

Share this article!