KUCHING: Sarawak merambu deka ngenukuka taun 2019 nyadi ‘Taun Nemuai Ke Sarawak’, ku Menteri Dagang Temuai, Art, Main Asal, Nembiak Lumba enggau Main, Datuk Abdul Karim Rahman Hamzah.
Ku iya, pekara tu beguna amat ngambika aktiviti ungkup sepanjai taun nya ulih disediaka, ku iya pengudah nyadi chairman aum Festival Jazz Tebing Kuching 2017 kemari.
Festival keterubah endar nya deka diatur kena 29 enggau 30 September tu ila.
Ku iya, kitai dekaka bala temuai ti datai ke Sarawak meda lalu beratika pengaya pesaka menua kitai.
Karim mega madah, sepanjai bulan Oktober tu mayuh macham program bisi diatur ke kelimpah ari festival nya baka What About Kuching (WAK).
“Festival Jazz sebedau tu diatur ninting taun di Miri sereta dipasuk dalam kalendar dagang temuai nengeri ini,” ku iya.
Bisi 17 pemuzik tebilang jazz ari dalam enggau menua tasik deka mantaika pengelandik sida maya nya ila.
Program tu dipelanja Sarawak Society for the Prevention of Cruelty to Animals (SSPCA), Heart Treasures enggau The Ten Ringgit Club begulai enggau SEDC, Uber, Hotel Grand Magherita, Hotel Riverside Majestic, Opis Menteri Dagang Temuai, Art, Main Asal, Nembiak Lumba enggau Main, Dewan Bandaraya Kuching Utara, Amogha Tours & Travel, Place Borneo Mice Management sereta Maswings.
