KUCHING: Kepala Menteri Datuk Amar Abang Johari Tun Openg, udah bejadi Logo Baru DUN Sarawak beserimbai enggau nyambut pengerami 150 taun DUN udah ditumbuhka di Bangunan Kompleks DUN ditu, pagi semalam.
Nya mega nyadi atur pengawa ti keterubah ngerami 150 taun udah ditumbuhka di Malaysia.
Ku iya ba aum pengarang berita pengudah bejadi logo nya, Kaunsil Nengeri keterubah ditumbuhka Charles J. Brooke kena 8 September 1867, lalu sehari tu ny adi nyadi hari ti chukup besai sejarah ngagai DUN Sarawak.
“Sehari tu genap 150 taun DUN udah ditumbuhka dalam Malaysia lalu nyadi DUN ke pemadu tuai dalam Malaysia. Kelimpah ari nya mega nyadi DUN ke ngembuan kaban kabinet ti pemadu mayuh dalam Malaysia,” ku Abang Johari.
Ku iya baru, sebedau tu DUN mega kala ngatur pengerami beserimbai enggau genap 100,121,125 enggau 135 taun DUN udah ditumbuh.
Berebak enggau nya, semilan pengerami besai enggau semilan program mega deka beserimpai enggau hari besejarah tu.
Kelimpah bejadi logo pengerami enggau aktiviti bukai ke deka diatur iya nya Aum Kunsil Nengeri, bebaris, DUN Begulai enggau Rayat, bejadika ‘Jematan Emas’, ‘Majlis Jamuan Negeri’, Pemandang, ngelanchar e-Hansard DUN, ngelanchar Lagu DUN; ngelanchar Tepa Khas’ enggau ngelancharka bup.
Mega deka diatur Panggau Rayat DUN enggau mandangka Bungai Api Pekit Fotografi enggau Selfie/ Wefie, pekit ngelinsu enggau ngelukis bangunan DUN (kategori Sekula Primari & Tebuka); pekit ngubah bungai enggau Hari Nyambut Temuai DUN, pekit catur, pekit nginti, pekit nyumai enggau eksesais aerobik.
Pengerami nya pagi tadi bela digulu bala menteri, menteri muda enggau Kaban Kunsil Nengeri bukai.
