Yayasan S’wak dilempai tanggungpengawa nyaup ngerembai ekonomi digital

Chief Minister Datuk Patinggi Abang Johari Tun Openg

KUCHING: Kepala Menteri, Datuk Patinggi Abang Johari Tun Openg madah, ba pengawa ngerembaika ekonomi digital iya udah minta Yayasan Sarawak numbuhka sekeda mata pelajar baru dalam bidang kus baru nengah Bursari Pelajar Tun Taib dikena ngemansangka pengelandik dalam mayuh bengkah bidang.

Tu deka dipejalaika nengah pansik enggau pemansang di universiti sereta institusyen dalam menua enggau menua tasik.

Yayasan Sarawak ulih meri duit injau enggau skolarsip nyengkaum ke tuju pansik ba tikas degree enggau PhD, ku iya seraya madahka Yayasan Sarawak deka ngambi nembiak ba urung 23 iti kus ke bekaul enggau pansik.

Abang Johari bejaku munyi tu ba Gempuru Besai beserimbai enggau pengerami Ngintu Hari Pengada Tuai Megai Menua (TYT) Ke-81 Tun Pehin Sri Abdul Taib Mahmud di Dataran Kompleks Lumba enggau Main Sarawak ditu, pagi tadi.

Ku iya, kus baru nya nyengkaum kus biokimia, genetik, biologi molekul, cloud computing, analisis data, big data enggau telemetri, kejuruteraan perisian, mikrobiologi, interaksyen mensia-komputer enggau ke bukai.

Kus ti udah ditetapka perintah tu deka ngadaka bala graduate dikena nyikap menua nyapai ekonomi digital manggai ba taun 2020.
Iya mega madah, perintah udah ngambi pemutus ngemansangka pelajar TVET dikena nangkup pinta industri nyengkaum numbuhka palan latih teknikal enggau vokasenyal nambahka ti udah ditumbuh perintah besai.

Pengerami nya pagi tadi bela digulu bala menteri kabinet nengeri enggau ketuai ke bukai.