BINTULU, Dis 20: Bisi urung 250 iku raban Kristian Roman Katolik ari Gerija St George Sebauh udah bejalai bebala mayuh nyerumba Hari Krismas di pelilih Sebauh, empai lama udah.
Pengawa bejalai bebala mayuh nya udah disereta semua serak raban Kristian gerija nya enda ngira ti tuai biak, lelaki enggau indu.
Tuju pengawa diatur dikena ngedutka kaul ba raban Kristian di pelilih nya.
Program nya mega ulih ngangkatka penaluk ngagai batang pengarap Kristian kelimpah negapka basa enggau pangan diri sereta nempa kerjasama ba raban Kristian gerija nya.
Kelimpah ari nya, pengawa bejalai bebala mayuh nya mega nyadi kelai pengaga ati raban Kristian di pelilih menua nya ke deka ngintu Hari Krismas kena 25 Disember ke deka datai tu.
Berebak enggau nya, Sembiang Misa Hari Krismas deka diatur ba Gerija St George Sebauh kena malam 24 Disember berengkah ari pukul 7.30 lemai.
Raban Kristian ngelingi Sebauh dipinta datai tumu ngulu sembiang Misa Krismas nya. — DayakDaily
