BINTULU, Okt 17: Universiti Putra Malaysia Kampus Bintulu (UPMKB) nengah kerejasama Opis Kepala Menteri (Integriti enggau Ombudsman) deka ngatur Program ‘International Summer School 2018’.
Program nya deka diatur pengelama dua minggu berengkah ari Okt 20 ngagai Nov 4, ngagai barang bagi nembiak entarabansa ti belajar di menua tasik tauka ba universiti di menua tu.
Koordinator sekretariat program, Fakhzan Buang madahka tu sebengkah program ti ukai bepelasarka akademik ke deka dipejalaika dalam kandang dua nyentuk empat minggu bepanggai ba modul enggau pakej program.
“Kebendar program ti diatur ninting taun tu digaga kena nambahka kualiti atmosfera belajar entarabansa sereta pemansang pansik ti ditetapka dunya,” ku iya seraya madahka penyereta ari nembiak entarabansa ba program summer school tu ulih ngangkatka penuduk universiti sida kelimpah nempa mayuh kaul ba bemacham bidang.
Ku iya baru, program nya ti berambaika jaku “Diversity in Academia, Culture and Agriculture” mega betuju ngelakuka UPM ngagai renggat entarabansa laban nya deka ngaul bala pesereta ari menua bukai.
Ku iya, sekumbang program nya bala pesereta deka dibai ngelala bemacham daya idup di Sarawak, prospek enggau daya kereja sereta numbuhka rintai kaul nengah kerejasama nempa sereta negika daya idup, pansik, besilih penemu lalu diembing nyadi teladan ngagai raban nembiak.
Aktiviti ti udah diperambu ungkup program nya taun tu udah dilangkar dikena ngajar pengelandik baru ti silik, nempa pengering ati diri, ngangkatka pengelandik nyadi ketuai, nambahka pengelandik ngaga pemutus, ngelakuka pengawa dagang, meransang komunikasyen dunya sereta meransang kaul ba bala pesereta.
Penerang silik pasal program tu tau ditanya ngagai ketuai sekreteriat ba carolyne@upm.edu.my tauka nengah lumur 086 855289. — DayakDaily
