UPMB palan alai ngatur Festival Betanda Borneo Ke-7 kena 30 Okt

Poster Festival Betanda Borneo ke deka diatur ba UPM Bintulu kena Okt 30 tu.

BINTULU, Okt 12: Festival Betanda Borneo Ke-7 deka diatur di Universiti Putra Malaysia (UPM) kampus Bintulu, kena 30 Okt tu ila.

Festival nya ti diatur ninting taun deka ngempuru raban nembiak ari palan pelajar tinggi di serata Borneo, deka mantaika tanda ba tusun pengawa pengelama empat hari nya kelimah negapka tanggam kaul enggau bala pesereta ke bukai.

Koordinator Sekretariat Festival, Fakhzan Buang, madahka bisi batang kebuah ngatur Festival Tanda 2018 nya.

Ku iya, program nya deka nyadi platform alai besilih penemu dikena ngemansangka sereta ngintu seni nya ke rebak dudi.

Nengah festival nya ngarapka perintah ulih ngintu sereta ngemansangka artistik enggau pesaka asal enggau manah agi, ku iya.

Iya mega madahka  festival nya mega nyadi platform endur ngelaku penyelai pesaka enggau daya idup Sarawak dikena matih pesereta, ngambika nyadi chunto ngagai rebak baru kelimpah meri peransang ngagai gaya idup ke bepengerai nengah chara malutka diri ba aktiviti ke baka nya.

Ku Fakhzan baru, ungkup timpuh panjai Festival Tanda Borneo nya dikearap ulih negapka akademik enggau pansik kerejasama entara universiti Borneo sereta ngiga jalai ke pemadu engkeman alai besilih penemu enggau servis entara universiti.

Nengah festival tu mega dikearapka ulih nyadi nyadi platform ngatur aum besai enggau bengkel renggat dunya sereta ngangkatka pemanah nama Borneo nyadi palan komersil ke pemadu manah endur eko-dagang temuai ngangkatka pesaka asal Borneo ngagai renggat entarabansa, ku iya.

Festival tu keterubah endar diatur UiTM Kota Samarahan dalam taun 2006 ungkup kererubah enggau kedua.

Nangkanka nya, UiTM Kota Kinabalu, Sabah, diberi basa nyadi pengatur festival ungkup renggat ketiga ditampung Universiti Tanjung Pura, Kalimantan, ungkup ke empat kali.

Udah nya, UiTM Samarahan sekali agi dipilih endur ngatur festival renggat ke-5 ditangkanka renggat ke-6 diatur ba Universiti Mulawarman, Samarinda, Timur Kalimantan, Indonesia.

Ku Fakhzan baru, festival ke sekali tu deka ngempuru 13 raban ari universiti di serata Borneo baka ari UPM Bintulu, UiTM Samarahan, UiTM Kota Kinabalu, UNIMAS, Universiti Malaysia Sabah (Labuan International Campus), SIDMA College Sarawak, SIDMA College Sabah, University Of Brunei Darussalam, Universiti Tanjung Pura, Universiti Lambung Mangkurat, Universiti Palangkaraya, Universiti Mulawarman enggau Universiti Borneo Tarakan.

Festival ke sekali tu diatur UPM Kampus Bintulu begulai enggau Opis Menteri Dagang Temuai, Seni, Main Asal, Nembiak Lumba enggau Main sereta Kaunsil Seni Sarawak enggau Opis Residen Bintulu.

Mensia mayuh diperansang datai ngulh festival nya lalu penerang silik tau ditanya nengah lumur 086-8555213, tauka penerang ke pemadu baru tau dipeda nengah Instagram sida @ftb.upmkb. — DayakDaily