Undang-Undang ngukum pemesai sengaja ngerugi,menyati duit perintah deka digaga

A statue of Lady Justice. — DayakDaily.com file pic. // Photo: Pixabay

PUTRAJAYA, Jun 8: Perintah deka ngaga siti undang-undang ngambi atur ulih ditinggang ba pemesai ke sengaja ngujungka pengerugi tauka menyati duit perintah.

Ketuai Direktor Pusat Governans, Integriti enggau Antirasuah Negara (GIACC) Tan Sri Abu Kassim Mohamed madah, semua opis menteri deka dipinta ngelala ambis nadai tiga pengelemi dalam undang-undang, polisi enggau atur ke bisi diatu bekaul enggau opis menteri nya ti tau ngasuh pengawa masau belanja nyadi.

“Ripot nya meseti dikenatai ngagai GIACC dalam timpuh sebulan berengkah ari sehari tu,” ku iya ba aum media pengudah ngulu aum Jawatankuasa Kabinet Mengenai Keutuhan Pengurusan Kerajaan (JKKMKPK) ditu sehari tu tadi.

Aum media nya bela digulu Menteri Besai Tun Dr Mahathir Mohamad ke nyadi chairman aum nya. Sama bisi datai Sapit Menteri Besai Datuk Seri Dr Wan Azizah Wan Ismail, Menteri Dalam Negeri Tan Sri Muhyiddin Yassin nggau Menteri Wangan Lim Guan Eng.

Bejaku baru, Abu Kassim madahka pekara nya betuju ke mutarka penanggul makai suap ke nyadi ba opis perintah, ke mega entara pekara ti diputuska dalam aum nya setipak enggau pengawa perintah ngemanahka menua nengah danji dalam manifesto Pakatan Harapan (PH).