Ulah mejal Ketuai Komuniti udah lama dikemeranka Perintah BN — Munan Laja

Munan Laja

KUCHING, Okt 23: Pengawa ke nagang Tuai Rumah tauka Ketuai komuniti sigi udah lama dipejalai Perintah Barisan Nasional (BN) tauka (GPS).

Presiden Sarawak Workers Party (SWP) Munan Laja madah, mayuh bala tuai rumah dipejal enda diasuh rumah panjai sida dikena parti politik bukai endur ngatur pengawa kelimpah ari BN/GPS.

Ku iya, diatu pekara nya diteritka agi nengah surat tesau ti dikeluarka ari Sekretari Perintah Menua ke bedau lama udah, ke nagang bala Ketuai Pupu Bansa enggau Ketuai komuniti ngulu pengerami ke ukai diatur perintah GPS.

“Bala tuai rumah dipejal dipinta enda ngasuh rumah panjai sida alai parti politik bukai ngatur pengawa kelimpah BN tauka GPS”

“Diatu pengawa nagang nya diteritka agi nengah surat ti dikeluarka Sekretari Perintah Negeri,” ku iya.

Pekara ke baka tu udah ngujungka nempa laya ba peranak rumah ti ngujungka sida pambar, ku Laja baru.

Penemu tu enda manah laban penemu nya baka ke ngaga Ketuai komuniti baka sempama jaku “Katak dalam tempurung” ti semina mendingka polisi GPS aja, ku iya.

“Nya penemu ke salah dalam dunya demokrasi labannya baka sempama jaku” dian diri empu ditungkun, dian orang dipadam”.

Sapa ke megai Perintah Negeri Sarawak enda tau ngena chara pejal sereta ngemba rayat, ku iya.

Kebuah pia ku iya, laban nya tau ngasuh ketuai komuniti nyadi orang ke nangi bejaku mantaika penanggul ke ditapi nembiak redak lalu pekara nya enda ulih dilempai ngagai orang ke patut.

Ku Laja, anang ngasuh ketuai komuniti nyadi orang ti nangi mansutka penemu ba sentang pekara ke amat.

Pekara ke baka tu patut diketu laban sida enda tau mejal sereta ngemba rayat belama.

Rayat Sarawak deka meda orang ke megai menua tu ngena polisi ke manah, ukai ngena chara ngemba, ku Laja. — DayakDaily