Oleh Chris Bishop
KUCHING, 1 NOV: Miding nerima pinta ke tinggi ari rayat menua Singapura, ku Sapit Kepala Menteri Datuk Amar Douglas Uggah.
Bedau lama tu tadi ku Uggah, miding ke diambi ari Betong lalu dijual di Singapura chukup laku di menua nya.
“Enda nganti lama pengudah datai makit Singapura, miding abis di jual.
“Miding tu dibungkus pemerat 250 gram lalu dijual nengah rega $3 Singapura, alai sekilogram dijual $12,” ku iya ba ba pengawa ngelanchar ‘Roadshow’ Gabungan Parti Sarawak(GPS) di Rh. Hendary Jawan, Serudit Atas di Betong malam tadi.
Ba pengawa nya, Uggah ke mega Sapit Presiden Parti Pesaka Bumiputera Bersatu(PBB) bela ngelanchar PBB pampang Ulu Brutan.
Berindik ari makit ke manah di Singapura, Uggah ngelalau bala ketuai akar umbi ngulihka penemu sentang polisi pemansang ke udah dituku perintah ungkup pemaik rayat.
Ari nya ku iya, bala Wanita, Bapa sereta Pemuda PBB tau bekunsika polisi nya ngagai rayat kelebih agi sida ke bisi kaul enggau pengawa betanam betupi.
“Semua ketuai dalam parti mesti pro-aktif ngiga chara ti ulih mantu perintah ngangkatka tikas pengidup rayat nengah program nambah penatai pemisi.
“Perintah GPS udah nyendiaka mayuh program ke baka tu kelebih agi ba sektor betanam betupi,’ku Uggah ke mega Menteri Betanam Betupi Moden, Tanah Adat enggau Pemansang Kandang Menua.
Tambah iya, juluk perintah iya nya deka matak mayuh agi orang bekebun ngambi bagi chara bekebun moden baka ke fertigasyen enggau hidroponik.
Ku Uggah, bekebun chara tu enda begunaka tanah ti besai tang semina ngintu utai ke ditanam nitihka jam ke udah ditetap sereta enda begunaka mayuh pekerja.
“Ungkup komuniti Dayak di menua pesisir, sida diperansang ngambi bagi ba pengawa nupi jani.
“Dagin jani tu bisi masuh pinta, nyengkaum ba maya kitai bisi dituntung penusah alai tu meh potensyel iya,’ku Uggah.
Ba sentang pekara politik, Uggah meri terima kasih ngagai peranak di 9 rumah panjai sereta Chairman Gerempung Ketuai Rumah Panjai Spaoh, Joseph Suat ti nyukung iya sekali agi nyadi chalun DUN Bukit Saban maya pengawa bepilih ti deka datai.
Joseph ba pengawa nya ngarika 43 iku tuai rumah bukai.
Ngenatai jaku terima kasih, Uggah madah perintah GPS sigi patut diberi mandat merintah negeri ketegal ti ngembuan mayuh peneleba sereta bisi raban ketuai ke ditemu landik.
“Sekeda orang madah kitai mesti milih raban ketuai enggau perintah kebaru. Tang kitai mesti ngambi teladan ari sejarah ke udah nyadi.
“Perintah Pakatan Harapan(PH) ke dulu suba kelalu mayuh ‘u-turns’ sereta polisi ke enda tentu ti ngujungka gempung nya pambar,’ku Uggah.
Ba pengawa nya, Uggah bisi nyuaka perengka meresa pengangat tubuh enggau monitor tv ngagai Pengerusi SRK Paku Sentral Tr Reseely Usit ngambi tau dikena sekula nagang pengerekai Covid-19.
Bela datai Sekretari Politik Kepala Menteri Dr Richard Rapu.-DayakDaily
