Uggah: Dua juta hektar tanah dikemansang nengah pengawa betanam betupi 

Uggah (tengah) nerima momento ari Pengatur Aum, Tan Sri Michel Yeoh pengudah meri licha ba aum nya.

KUCHING, Sept 30: Sarawak nagit ngemansang dua juta hektar tanah nengah pengawa betanam betupi kelebih agi ba atur ngemansutka pemakai.

Sapit Kepala Menteri Datuk Amar Douglas Uggah Embas madah pengawa nya deka mantu juluk ngangkatka negeri tu nyadi pemansut pemakai manggai 2030.

“Pengawa betanam betupi deka dikemansang chara moden, kitai nguna teknologi pintar ngambi ulih nambah produktiviti enggau kualiti kelimpah ngeringka pengawa bukai ke bekaul.

“Mayuh agi palan ngumpul, ngaga proses sereta mungkus deka ditumbuh alai pengawa pansik deka chakah agi dikereja.

“Kitai mega deka nyendia puku ungkup orang dagang agro sereta ngeringka gerempung orang bekebun ngambi sida ulih ngemujur tanggungpengawa,” ku iya.


Uggah mansutka jaku nya ba licha rambau Aum Dagang enggau Beranaka Puku Sarawak 2019 ba siti hotel ditu, seharitu.

Uggah ke mega Menteri Betanam Betupi Moden, Tanah Adat enggau Pemansang Kandang Menua madah juluk nya ulih dijapai ketegal Sarawak bisi pengelebih.

Ku iya, gaya hari ke manah sereta suah ujan kelimpah nadai napi penanggul ngulihka orang gawa entara pengelebih ke dikembuan Sarawak.

Iya mega madah kompeni pribit ke ngambi bagi ba pengawa betanam betupi megai tanggungpengawa besai ngemujurka juluk nya.

Ngenang sentang dua juta hektar, Uggah madah semua tanah nya dalam empat kandang endur pemansang iya nya Upper Rejang Development Agency (URDA), Highland Development Agency (HDA), Northern Region Development Agency (NRDA) enggau Integrated Regional Samarahan Development Agency (IRSDA).

“Kitai mega bisi tanah ba Sadok Agropolitan sereta palan pemansut pemakai entara Betong ke Sarikei enggau palan nupi babi,” ku iya. — DayakDaily