“This article is a translation of Longhouse fires in Sarawak, a growing concern – Part 3 originally published on December 26, 2018.”
Translation by Chris Bishop
BA TUSUN Keterubah — Karam di Darat, penusah ke majak nyadi sereta balat ngirau, DayakDaily bejuraika kes penusah angus rumah panjai ke majak nambah dalam timpuh tiga taun sereta pemerinsa ke ditapi mansa angus.
Ba Tusun Kedua, DayakDaily bekunsi penemu enggau idea raban pemesai ‘senior’ ari Opis Bomba sentang chara ke ulih dikena nyeliah penusah karam di darat tu nyadi.
Ungkup Tusun Ketiga, DayakDaily nusuika kebuah penusah tu nyadi enggau bengkah pengawa tauka program ti udah diatur dikena nerenak pemereti sentang pengelikun bekenaka api.
Kebuah Penusah Nyadi
Dalam timpuh tiga taun ke udah, wayar lama, kelalu mayuh numpilka wayar ari perengka lektrik ngagai siti suket, pengawa nunu enggau nyumai ke enda dijaga, macis sereta dian entara kebuah ke tau ngasuh rumah panjai angus.
Ba taun 2017, ari penyampau 26 kes angus rumah panjai, pengilap ba dapur nyadika kebuah ke pemadu suah digaga iya nya 10 kes.
Tu ditankanka enggau wayar lama ti mercikka api, tauka suket ke kelalu mayuh ditumpilka wayar ari perengka lektrik (9 kes) enggau pengawa nunu (7 kes).
Ba taun 2016, pansik ke digaga ijinsi ngayanka ari penyampau 20 kes, 10 nyadi ketegal kelalu mayuh wayar ditumpilka ba siti suket, lapan kes ari pengawa nyumai enggau dua ari pengawa nunu.
Ngelama ke udah, iya nya maya kandang menua pesisir bedau mansang, penusah angus tu jarang nyadi. Maya nya genturung pendiau di menua pesisir bedau disambung ngagai grid lektrik.
Dalam timpuh berapa taun tu iya nya asil ari pemansang ke udah digaga, majak mayuh genturung pendiau di menua pesisir udah bisi bekal lektrik lalu tu siti berita manah ungkup sida.
Tajapia, pemansang tu mai sebengkah penusah alai peranak menua pesisir enggau enda berunding panjai udah besambungka wayar sengapa lalu sekeda nya numpilka semua wayar perengka lektrik ba siti suket.
Ketuai Direktor Bomba Datuk Mohammad Hamdan Wahit ba penemuai ngagai rumah panjai Uma Lahanan enggau Uma Daro di Sungai Asap, Belaga, madah tebal agi penusah angus nyadi bepun ari sambung lektrik.
“Kelimpah ari nya, nyauka semua rumah panjai di Sarawak rumah lama lalu ketegal nya nadai digaga penyeliah penusah angus baka ke dinding pengenan api tauka dinding pemagi entara bilik,” ku iya.
Ketegal pengawa nirika rumah panjai enda begunaka pemendar ari ijinsi perintah, nadai orang ulih mejal peranak rumah panjai ngubah rumah sida tauka minta sida ngaga penyeliah penusah angus.
Nerenak Pemereti ngagai mensia mayuh
Ba atur ngintu pengelikun peranak di menua pesisir, Bomba udah ngambi inisiatif lalu ngaga program ke patut ke dikearap ulih mutarka pemar tu.
“Kitai ngatur mayuh program ti nerenak pemereti ba sentang pengelikun enggau chara nyeliah penusah angus ba rumah panjai baka ke kimpin ‘outreach’ rumah panjai, summer camp, Bomba komuniti enggau Emergency Response Teams (ERT) nengah kerejasama ijinsi perintah negeri.
“Nambahka nya, kitai mega numbuhka Unit Sukarela Bomba kelimpah nyendia program Bomba ngagai bala nembiak.
“Nengah bantu peranak rumah panjai ke udah dilatih sentang chara madamka api, enti penusah bisi nyadi sida ulih nyaup nyeliah api nyerarai,” ku Hamdan.
Naka bulan Disember 2018, Sarawak udah bisi 503 unit Bomba Komuniti ti dipasuk 4,771 iku orang enggau 60 unit madamka api sukarela ti dipasuk 2,315 iku orang, sereta 186 iku pemantu madamka api.
Siti chara mudah ke ulih nyaup ngurangka statistik kes rumah panjai angus iya nya ngena perengka madam api lalu dikena sida ke udah dilatih.
Direktor Bomba Sarawak Khirudin Drahman madah naka Disember 2018, 749 rumah panjai udah numbuhka tim Bomba Komuniti. Opis Bomba, ku iya, dekaka mayuh agi tim tu ditumbuh ba taun 2019.
Khiruddin mega madah Bomba deka meratka 3P iya nya Precaution (jejimat), Prevention (nyeliah) enggau Protection (ngintu) ba peranak rumah panjai.
Ku iya, 3P nya patut dikemeran enggau berat alai pengawa tu ulih nyeliah penusah angus nyadi.
“Enti semua ulih ngemeranka 3P tu, kitai ulih ngurangka penusah angus kelimpah ngurangka pengerugi.
“Kelimpah ari nya, ijinsi kami mega udah nyendia bengkah pelajar sentang chara ngintu pengelikun ari api nengah program Kelab Keselamatan Kanak Kanak (3K),” ku iya.
Khirudin ti keran nerenak pemereti tauka pelajar ngagai bala nembiak meransang tadika, sekula primari nyengkaum bala apai indai nganjung anak sida ngulu program pemereti sentang guna ngintu pengelikun ari api. — DayakDaily
Antika Tusun Keempat udah tu
