BINTULU: Ex-Menteri Besai, Tun Dr Mahathir Mohamad patut minta ampun ngagai rayat Sabah enggau Sarawak laban enda teberika pemansang ngagai dua buah nengeri nya sekumbang 22 taun merintah.
Kaban Parlimen Bintulu, Datuk Seri Tiong King Sing madah,maya Mahathir ngiring menua suba, kededua nengeri tu meri penatai pemisi ke besai ngagai menua tang asil enda dibagi manah dikena ngemansangka Sabah enggau Sarawak.
“Bepelasarkan rikod, mayuh ungkup belanja ninting taun dikemendarka Tun Dr. Mahathir ke Sabah enggau Sarawak pengelama 22 taun bekuasa nyadi Menteri Besai.
“Iya ‘berutang’ minta ampun ngagai Sabah enggau Sarawak laban enda teberika ungkup belanja ke diguna dikena ngemansangka rayat dua nengeri tu kelebih menua pesisir” ku iya ba aum media ditu, empai lama.
Lebuh iya ngenang pasal semaya pemeri baru Pakatan Harapan ungkup menua Sarawak nyerumba Pengawa Bepilih Besai Ke-14 (PRU-14) ti dilancharka Mahathir maya Licha Besai di Kuching kena malam 24 September tu tadi, ku Tiong madahka diri berasai sinu ati meda video nya laban ex Menteri Besai nya jauh nyelai ari maya iya ke agi mangku pengawa nyadi Menteri Besai suba.
“Lebuh meda video nya , aku berasai sinu laban keterubah aku nyadi MP suba ba taun 1999 ari baru pegai iya maya nya,” ku iya seraya nandu baru madahka Mahathir patut minta ampun ngagai kededua buah nengeri tu.
