MIRI, April 27: Mandal Presiden SUPP ke mega Chairman Komiti Pengamata Pengawa Bepilih Parlimen Miri Datuk Lee Kim Shin madahka tim iya arap endar ulih ngambi pulai Miri seraya meransang rayat nyukung kelebih agi pengundi di Miri.
Ku iya, tim PRU Barisan Nasional (BN) ungkup kerusi P219 Miri ti betuaika SUPP Miri, sedia chakah gawa dalam timpuh 11 hari ke penudi sebedau hari ngundi Mei 9 ngulihka sukung ungkup chalun BN Datuk Sebastian Ting.
Ku iya, taja komiti operasi nya ti ditumbuh ujung taun nyin tadi tang udah lama gawa ba renggat rayat.
Ku iya, nyauka tiap hari, kenyau lebih ari setaun, tim SUPP nya udah gawa mantu rayat.
Timpuh 11 hari ti diberi endur bekimpin ke bendar enda chukup enti sigi amat bebendar bekimpin.
Ku iya, pekara ke beguna amat iya pemujur ke diulih kami sepanjai taun siti nyin tadi ti ulih dipeda rayat.
Dulu ari nya, Lee udah nyuaka borang nyadi chalun ke udah dibeli iya ungkup chalun BN-SUPP ba kerusi P.219 Miri Datuk Sebastian Ting.
Nyerumba pengawa ngantung nama chalun, Sebastian ti mega Kaban Kunsil Negeri (ADUN) Piasau, deka disempulang Lee enggau Sapit Speaker DUN Datuk Gerawat Gala, nuju palan ngantung nama chalun di Dewan Suarah Miri. — DayakDaily
