KUALA LUMPUR, Mei 22: Menteri Besai Tun Dr Mahathir Mohamad setuju numbuhka siti Tim Nasat 1Malaysia Development Berhad (1MDB), pia ku penerang ari Opis Menteri Besai kemari.
Tuju tim nya, nasat silik, nyidi sereta ngambi pulai aset sereta nawa orang ri ngereja penyalah ngatur 1MDB.
“Raban tim tu iya nya ari Opis Nagang Makai Suap Malaysia (SPRM), Opis Luyar Menua, Polis Di Raja Malaysia, Bank Negara Malaysia enggau beberapa iku luyar ti ngembuan pengelandik ba pekara bekaul,” ku iya kemari.
Tim nya betuaika ex-Luyar Menua Tan Sri Gani Patail, ex-Ketuai Komisioner SPRM, Tan Sri Abu Kassim Mohamed, Ketuai Komisioner SPRM Datuk Seri Mohd Shukri Abdul enggau Datuk Abdul Hamid Bador.
Ku penerang nya baru, tim nya deka bejalaika tanggungpengawa ba semua sukut ngemata tasat, nyidi duit enggau aset ke datai ari pengawa salah ngelimpangka wang turu 1MDB ti ditaruh tauka diperanak ba menua tasik.
“Tim nya mega bejalaika tanggungpengawa nempa kaul enggau bemacham ejensi penerit adat Amerika Syarikat, Switzerland, Singapura, Kanada enggau menua bukai ke bekaul,” ku iya.
Ku penerang nya, nengah kaul enggau bemacham ejensi penerit adat, komti nya dikearap ulih mulaika pemaik nama menua ke udah kamah ngelama tu.
Kelimpah ulih mulaika duit enggau aset rayat Malaysia berindik ari skandal kleptokrasi beduduk ari pengawa salah enggau ngelimpangka wang turu 1MDB, ku iya. — DayakDaily
