MIRI: Terabai Menua (TM) sebuah gerempung ukai dikuasa perintah (NGO) mantah tusun penggal kemisi sekula ungkup taun 2018, ti dikeluarka Opis Menteri Pelajar.
Pekara nya ti dikerembai ba media sosial, udah ngeletak kemisi tengah taun enda baka ngelama tu ke alai kemisi nya berengkah ba minggu kedua dalam bulan Jun, iya nya berengkah ari 9 nyentuk 24 Jun 2018.
Presiden TM, Mark Jenggo ensana madahka tusun kemisi nya baka deka nyeliahka ari ngintu pengetami Hari Gawai Dayak ti diintu kena 1 enggau 2 Jun (Hari Lima enggau Enam), taja pan sida nemu pengerami nya sebengkah pengerami ke besai ungkup majoriti peranak Sarawak kelebih agi bansa Dayak.
Ku iya, pengawa ngubah haribulan kemisi nya ngagai 9 haribulan nya deka ngenusahka apai indai bansa Dayak mai bala anak sida pulai ngintu pengerami Gawai kelebih agi ti gawa di luar Sarawak, laban sida agi nampung sekula ba hari ti nangkanka nya.
Mark madah, ngubah haribulan kemisi nya dipeda baka ke enda sensitif enggau pengerami besai ti diintu pupu bansa ke lebih agi Bansa Dayak laban pengerami nya sigi udah diletak dalam kalendar pengerami besai di Malaysia.
