Tentuka sambung wayar lektrik sekula digaga manah — DAP Sri Aman

(Ari kiba) Leon enggau Chang nunjukka sarang fius lektrik ke telenga tau ngeruga pengelikun nembiak enggau pengajar SJK Chung Hua Undop.

Dikarang Chris Bishop

SRI AMAN, 6 April: Ikas pengelikun sambung wayar lektrik di SJK Chung Hua Undop di Sri Aman meseti ditentuka manah.

Pinta tu dikenatai Chairman DAP Sri Aman, Leon Jimat Donald, ba penemuai kereja iya ke sekula nya kena 4 April tu tadi.

Ba penemuai nya, Leon bisi mendingka jaku penerang ari Kepala Pengajar Mary James sentang pendiau sekula nya maya ke diatu.

“Kami mega bisi dibai ngemata kandang ngelingi sekula kelebih agi balai mayuh guna ke udah tembu digaga. Diak, aku berasai tekenyit pengudah meda sambung wayar lektrik enda ditutup enggau manah.

“Sambung wayar ba balai mayuh guna ke enda bedinding nya telenga pia aja,” ku Leon.

Balai Mayuh Guna SJK Chung Hua Undop ke digaga nadai bedinding.

Nitihka jaku kepala pengajar, ku Leon nambah, kuntrektor enggai ngaga dinding kelimpah ngelakka sarang fius lektrik telenga pia kena panchar panas enggau ujan.

Iya ngasai ulah ngelakka sambung letrik enggau sarang fius nya telenga tau ngeruga pengelikun nembiak ke besekula diak.

“Balai tu enda likun dikena nembiak enggau pengajar kelebih agi ba maya hari ujan.

“Majlis Daerah Sri Aman (MDSA) ke nyadi ijinsi matau projek meseti nentuka pengelikun sebengkah pekara ke patut dulu dikemerat, wayar lektrik enggau sarang fius meseti ditutup,” ku Leon.

Bela nyempulang penemuai nya Sekretari DAP pampang Sri Aman Nangkai Tungol enggau Chairman Lembaga Pengintu Sekula, Chang Foh Chin. — DayakDaily